Aamunjile Mumoyo Makani Sikwiiya Wanu
1 Katanaa kuunka kujulu, Jesu wakaambila basikwiiya bakwe kuyiisya bamwi ‘ikujatisya’ makani oonse ngaakabalailila. (Mt. 28:19, 20) Ikutegwa muntu “ajatisye” malailile aa Kristo, imakani ayelede kumunjila mumoyo. (Int. 119:112) Ino mbuti mbomukonzya kukulwaizya moyo wamuntu ngomwiiya limwi Bbaibbele?
2 Amupailile Busolozi bwa Jehova: Ikugwasya bamwi kuba basikwiiya, mmulimo wa Leza. Lugwasyo lwakwe, kutali nguzu zyesu nkekaambo kapati kapa kuti tuzwidilile. (Inc. 16:14; 1 Kor. 3:7) Aboobo, kupailila lugwasyo lwa Jehova kutegwa tuyiisye kasimpe kuli bamwi kulayandika kapati.—Is. 50:4.
3 Amuzibe Nzyasyoma Sikwiiya: Ikuziba bantu nzyobasyoma alimwi akaambo ncobasyomena boobo kulakonzya kutupa busongo kujatikizya nzyotunga twaamba kutegwa makani aabanjile mumoyo. Ino nkaambo nzi sikwiiya injiisyo imwi ncoimukkomanisya? Ino ncinzi cakamupa kuti atalike kwiisyoma? Luzibo luli boobo lulakonzya kutugwasya kukanana cabupampu.—Inc. 17:22, 23.
4 Amube Aabupanduluzi Bulimvwisya Alimwi Bwamu Magwalo: Ikasimpe keelede kulimvwisya kuli sikwiiya. (Inc. 17:24-31) Tweelede kupa kaambo kalimvwisya kujatikizya bulangizi bwesu. (1 Pet. 3:15) Pele amucite oobo lyoonse munzila yalubomba akukkazyika moyo.
5 Amukankaizye Kuyiisya Akubelesya Zitondezyo: Izitondezyo tazipi buyo sikwiiya kuti cimuubile-ubile kumvwisya, pele alimwi zilamukulwaizya mumiyeeyo yakwe. Zitondezyo zilaijatikizya miyeeyo alimwi amoyo. Jesu wakazibelesya ciindi aciindi. (Mk. 4:33, 34) Aino ikutegwa cigwasye kapati, citondezyo ceelede kweendelanaa kaambo kali mukubandikwa alimwi amubukkale bwasikwiiya.
6 Amutondezye Mpindu zijanika Kwiinda Mukutambula Kasimpe: Ibantu bayanda kuziba impindu zili mukutobela zintu nzyobali mukwiiya. Amumugwasye muntu ngomwiiya limwi kubona busongo buli mumajwi a Paulo aali kulugwalo lwa 2 Tim. 3:14-17.
7 Mutatyompwi pe kuti bamwi kabatateeleli kukuyiisya kwanu. Tabali boonse bantu ibakonzya kuswiilila. (Mt. 13:15) Nokuba boobo, bamwi balaba basyomi. (Inc. 17:32-34) Ikusola-sola kwanu mukwaamba makani aanjila mumyoyo aamulumbe wamakani mabotu akugwasya banji kutambula alimwi “akujatisya” nzyaakalailila Jesu.