Ino Makanze nzi Ngotujisi Notweendelezya Zyiiyo zya Bbaibbele?
1 Ino nkaambo nzi ncotweendelezya zyiiyo zya Bbaibbele zyaaŋanda? Sena tuyanda buyo kubapa luzibo, kusumpula buumi bwabantu naa kubagwasya kuti babone kumpela mbokubede? Nee. Imakanzeesu ngakugwasya bantu kuba basikwiiya ba Jesu Kristo! (Mt. 28:19; Inc. 14:21) Nkakaambo kaako, aabo mbotwiiya limwi beelede kuti kabaswaanganaa mbungano. Kuyaampela kwabo munzila yakumuuya kujatikizyidwe kapati mukwiimvwisya kabotu mbunga Yabunakristo.
2 Mbotukonzya Kuzwidilila: Nkweena buya kumatalikilo, kamumulomba sikwiiya kuti kajanika kumiswaangano yambungano. (Heb. 10:24, 25) Amupandulule eezyi mboziyooyumya lusyomo lwake, kumugwasya kucita kuyanda kwa Leza alimwi akumupa kuti kayanzana cakumaniina abantu aabo bayanda kutembaula Jehova. (Int. 27:13; 32:8; 35:18) Luyando lwanu ndomutondezya ambomwiilumbaizya mbungano alimwi amiswaangano, kuyoomupa kuti awalo atalike kuswaangana.
3 Ibapya beelede kuzyiba kuti imbunga ya Jehova njabunyina bwanyika yoonse. Amubatondezye ividiyo yakuti Jehovah’s Witnesses—The Organization Behind the Name and Our Whole Association of Brothers. Antela broshuwa yakuti, Jehovah’s Witnesses—Unitedly Doing God’s Will Worldwide. Amubagwasye kubona kuti Jehova uli mukubelesya tuulunzuma twabantu balyaabide munyika yoonse ikucita luyando lwake. Ibapya beelede kuzyiba kuti abalo balitambidwe kumubelekela Leza.—Is. 2:2, 3.
4 Cilakkomanisya ikubona sikwiiya Bbaibbele kuba sikwiiya wakasimpe wa Jesu. Aaya ngamakanzeesu!—3 Joh. 4.