Kusololela Basikwiiya ku Mbunga Ilaa Zina Lyesu
1 “Mulumbe waambwa mumilaka iinda ku 200. Mulumbe uumvwigwa mumasi aainda ku 210. Mulumbe uutolwa kufwumbwa kunga kwajanika bantu. Ndubazu lwa mulimo mupati wakukambauka inyika ngoitana bwene, imulumbe uukamantanya mamiliyoni nyika yoonse mbwiizulwa. Bakamboni ba Jehova babelekelaamwi kumanizya mulimo oyu kwamyaka iinda ku mwaanda!”
2 Oobo mbobutalika bupanduluzi bwa vidiyo yakuti, Jehovah’s Witnesses—The Organization Behind the Name. Ilazumanana kwiingula mibuzyo eyi: Ino mukasimpe, Bakamboni ba Jehova mbaani? Ino mulimo wabo weendelezyegwa buti? Kusololelwa? Kubbadelelwa? Ipa basikulangilila muzeezo wakuti “Bakamboni ba Jehova nyika yoonse mbwiizulwa bayiisidwe kuti babe mbunga iigwasya basimukobonyina ikubaa lusyomo mu Bbaibbele,” alimwi ilabakulwaizya kuti balibonene lwabo beni mbunga ilaa zina lyesu. Mukaintu umwi wakali kwiiya Bbaibbele naakayeebela vidiyo eyi, wakakkomana kapati akulumba akwaamba kuti: “Mbuti muntu umwi mbwanga taboni kuti eyi nimbunga ya Leza wakasimpe, Jehova?”—Amweezyanisye a 1 Ba-Korinto 14:24, 25.
3 Aumwi mukaintu wakali kwiiya Bbaibbele cakulekezya-lekezya kwaciindi cilamfu pele taakali kukonzya kuzumina kuti ciyiisyo ca Butatu ncakubeja. Mpoona walo amulumaakwe bakatondezyegwa vidiyo yesu. Bakaikkomanina kapati cakuti bakailangilila ziindi zyobile masiku ngaona. Kuciiyo cabo cakatobela, imukaintu wakatondezya luyandisisyo lwakuba Kamboni. Wakati wakali kubikkila maanu kukusyoma Butatu elyo wakaalilwa kulanga mbunga yesu abantu bali mulinjiyo. Ikuzwa kuvidiyo wakabona kuti waijana mbunga ya Leza yakasimpe. Wakali kuyanda kutalika kukambauka kuŋanda aŋanda mpoona-mpoona. Naakapanduludwa ntaamu zyaakeelede kutola kuti abe sikumwaya uutabbapatizidwe, wakati: “Ndilazicita zyoonse ziyandika lino-lino.” Wakazwa kucikombelo cakwe, wakatalika kuunka mumulimo wamumuunda alimwi wakasungwaala kukazya Butatu.
4 Cazibwa kabotu-kabotu kuti basikwiiya Bbaibbele balasumpuka munzila yakumuuya akusima kufwaambana ciindi nobaziba mbunga ya Jehova akuyanzana anjiyo. Kulibonya kuti nobakamana kubbapatizigwa ibali 3,000 lya Pentekoste, “bakacilisungweede mukwiisya kwabaapostolo, amukuswaana [antoomwe NW].” (Inc. 2:42) Kulayandika kapati kuti tubagwasye basikwiiya ikucita mbubonya asunu. Ino inga twacita buti obo?
5 Amuubweze Mukuli: Umwi aumwi sikucita bantu kuti babe basiciiya weelede kuziba kuti mmukuli wakwe wakusololela sikwiiya Bbaibbele kumbunga ya Leza. (1 Tim. 4:16) Acimwi cibeela caciiyo ceelede kubonwa kuti nintaamu yakuswena munsi-munsi abuzuba bwalukkomano iciindi mupya nayootondezya kulyaaba kwakwe kuli Jehova kwiinda mukubbapatizigwa mumaanzi. Umwi mubuzyo ngwayoobuzigwa ciindi caakusika afwaafwi cakubbapatizigwa ngwakuti: “Sena ulateelela kuti kulyaaba kwako akubbapatizigwa kukuzibya kuti uli umwi wa Bakamboni ba Jehova uuyanzana ambunga ya Leza yeendelezyegwa amuuya?” Aboobo cilayandika kapati kuti azibe kuti takonzyi kubelekela Leza kuti katayanzani cakusungwaala ambungano ya Bunakristo yakasimpe.—Mt. 24:45-47; Joh. 6:68; 2 Kor. 5:20.
6 Amuzumanane kuyiisya sikwiiya kujatikizya mbungano nyenzi antoomwe ambunga yamasi aandeenye ya Bakamboni ba Jehova. Kamucita oobo kucibeela comwe-comwe caciiyo ca Bbaibbele kutalikila kuli cakusaanguna. Kuzwa kumatalikilo, amumutambe sikwiiya kumiswaangano alimwi amuzumanane kumutamba.—Ciy. 22:17.
7 Amubelesye Zibelesyo Zipedwe: Imabbuku aainda kubota aakubelesya kweendelezya ziiyo zyaamunzi zya Bbaibbele ndi broshuwa lya Ncinzi Leza Ncayanda Kulindiswe? a bbuku lya Luzibo Lutola Kubuumi Butamani. Oonse obilo atondezya mbokuyandika kuyanzana a mbungano. Kumamanino aaciiyo 5 ca broshuwa ya Ncayanda kulembedwe kuti: “Kuti kamuyanda, mweelede kuzumanana kwiiya zya Jehova alimwi akumumvwida nzyayanda. Kujanika kumiswaangano ku Ŋanda ya Bwami nyinzi ya Bakamboni ba Jehova kuyoomugwasya kucita boobu.” Ibbuku lya Luzibo lilaindulula kukulwaizya sikwiiya ikuyanzana kumiswaangano. Cibalo 5, muncali 22 waamba kuti: “Bakamboni ba Jehova . . . balamukulwaizya nywebo kuti mube alubazu mukukomba Leza ‘mumuuya amubwini.’ (Joh. 4:24)” Cibalo 12, muncali 16 waamba kuti: “Mbomuyabuzumanana mukwiiya ooku akubaa ciyanza cakujanika kumiswaangano ya Bakamboni ba Jehova, lusyomo lwenu luyooindila kuyuma.” Cibalo 16, muncali 20 waamba kuti: “Amucicite kuba ciyanza ikujanika ku miswaangano ya Bakamboni ba Jehova.” Cilayungizya akuti: “Eeci ciya kumugwasya kuteelela mpoona akubelesya luzibo lwa Leza mubuumi bwenu alimwi cilamuletela kukondwa. Ikuba umwi wabunyina bwa Bunakristo ibwanyika yoonse kulamugwasya kuswena lyoonse kuli Jehova.” Cibalo 17 cilabandika kabotu-kabotu muntu mbwanga wajana kuliiba kwini-kwini akati kabantu ba Leza. Mbotuyabwiiya abambi mmukuli wesu wakusinizya kwaamba zibeela ezi zyamakani.
8 Ibroshuwa ya Jehovah’s Witnesses—Unitedly Doing God’s Will Worldwide ncibelesyo cibotu calo cakabambilwa kuti cizibye bantu imbunga iilibonya njabelesya Jehova sunu ikucita kuyanda kwakwe. Imakani ngoijisi aajatikizya mulimo, miswaangano alimwi ambunga ayookulwaizya sikubala ikuyanzana andiswe mukukomba Leza. Mbucatalikilwa buyo ciiyo ca Bbaibbele, kulalombozyegwa kuti twamupa sikwiiya kkopi ya broshuwa eyi kutegwa alibalile mwini. Takuyandiki kuti mane twiiye buya anguwe mbuli mbucakabede mazubaa inda.
9 Amwi mavidiyo ngoyabamba Sosaiti nzibelesyo zibotu kapati mukusololela basikwiiya kumbunga iilaa zina lyesu. Inga cabota kuti baalangilila (1) The New World Society in Action, kwiindulukwa kwacipekupeku camu 1954 calo cakatondezya kubeleka kabotu, kusungwaala alimwi amuuya waluyando walo mbunga ya Jehova ngoibelesya; (2) United by Divine Teaching, yalo iilanga-langa lukamantano lwaluumuno lwalo lwali kutondezyegwa mumiswaangano yamasi aandeenye mu Eastern Europe, South America, Africa, alimwi amu Asia; (3) To the Ends of the Earth, yalo yakakkwanisya myaka iili 50 yakuzyalwa kwa Watchtower Bible School of Gilead alimwi ilatondezya mbuli mulimo wabukambausi wanyika yoonse mbowajatikizigwa akaambo ka mamisyinali; (4) Jehovah’s Witnesses Stand Firm Against Nazi Assault, yalo yaamba makani aaenzya mubili aajatikizya busicamba bwa Bakamboni alimwi aluzundo kukupenzyegwa kwini-kwini kwalunya kwa Hitler; mpoona a (5) Jehovah’s Witnesses—The Organization Behind the Name.
10 Amulibikkile Mbaakani Zitolaambele Kumakani aa Miswaangano: Ceelede kupandululwa kuli basikwiiya kuti kwiiya munzila zyoonse zyobile kulayandika, ikwiiya kwakuŋanda kwalo kucitwa muciiyo ca Bbaibbele caaŋanda alimwi amibandi yamucikolo yalo iicitwa kumiswaangano yambungano. (Joh. 6:45) Imupya weelede kuyaambele awalo mukuteelela kwa Magwalo alimwi ambunga. Kutegwa eco cicitike kunyina cimbi ncotunga twacita kunze lyakujanika kumiswaangano. (Heb. 10:23-25) Kamutalika kutamba muntu kumiswaangano mpoona-mpoona. Bamwi bapya balatalika kujanika kumiswaangano nobatanabaa ciiyo ca Bbaibbele caaŋanda calyoonse. Aino tuyanda kupa cikonzyanyo cibotu swebo kwiinda mukujanika ciindi coonse kumiswaangano.—Lk. 6:40; Flp. 3:17.
11 Amumwaambile makani manji kujatikizya miswaangano alimwi ambuli mbuyeendelezyegwa kutegwa sikwiiya atakalibiliki aakujanika kumiswaangano ciindi cakusaanguna. Mbwaanga bantu banji balalibilika nobaunka kumasena mapya ciindi cakusaanguna, inga cabota kumusindikila sikwiiya ku Ŋanda ya Bwami ciindi najanika ciindi cakusaanguna. Uyoomukkala moyo kuti naa kamuli anguwe ciindi naanzyanya abasimbungano. Amusolekesye kuba simeenzu mubotu kumweenzu wenu, kumucita kuti alimvwe kuti watambulwa camaanza obilo alimwi amoyo umukkale.—Mt. 7:12; Flp. 2:1-4.
12 Amukulwaizye sikwiiya kuti akajanike ku muswaangano waalubazu, wabbazu naa wacooko kuciindi cakusaanguna. Antela mulakonzya kumubikkilizya mububambe bwanu bwa zyeendela.
13 Amumuyiisye Kulumba Camoyo Woonse: Ibbuku lya Olinganizidwa Kutsiriza Uministala Wathu, apeeji 92 lilapandulula ategwa: “Ikuti naa kulumba kwanu nobeni kwa mbunga ya Jehova kulalibonya mumibandi yanu abantu bayanda kwiiya, ciyoobaubila kutalika kulumba alimwi ciyoobapa kuti bayaambele kapati mukuziba Jehova.” Ciindi coonse kamwaamba bubotu ikutali bubi bwambungano yanu nyenzi. (Int. 84:10; 133:1, 3b) Mumipailo njomupa nomuli aciiyo ca Bbaibbele, amubande mbungano alimwi akuyandika kwasikwiiya kuti ayanzane ciindi aciindi anjiyo.—Ef. 1:15-17.
14 Masimpe tuyanda kuti bapya balumbe camoyo woonse akaambo kabulongwe bubotelezya alimwi akuliiba kwakumuuya ikujanika akati kabantu ba Leza. (1 Tim. 3:15; 1 Pet. 2:17; 5:9) Mbotuli Bakamboni ba Jehova, atusoleke mbuli mbotukonzya ikusololela basikwiiya ba Jwi lya Leza kumbunga iilaa zina lyesu.
Majwi aakwelelezya sikubala aali apeeji 3]
Basikwiiya baunka ambele kufwambaana munzila yakumuuya ciindi nobalibonena mbunga beni
Majwi aakwelelezya sikubala aali apeeji 4]
Mutamuki kutamba basikwiiya kuti bajanike kumiswaangano