Amubagwasye Bamwi Kutegwa Kabajanika Kumiswaangano
1 “Kufwumbwa balongwe mbotukkala limwi . . . ibayanda kunoojanika kumiswaangano batambwa amoyo omwe.” Kuzwa ciindi eco kwaambilizya ooku nokwakacitwa mumagazini yakali kwiitwa kuti Zion’s Watch Tower yamu November 1880, Bakamboni ba Jehova cabunkutwe bali kutamba bantu kuti babungane antoomwe kutegwa baambilwe malailile aamu Bbaibbele. (Ciy. 22:17) Eeci ncibeela ciyandika kapati mubukombi bwakasimpe.
2 Kujanika Ncintu Ciyandika Kapati: Tulalongezyegwa ciindi notuyanzanaa mbungano. Tulamuziba kabotu-kabotu Leza wesu mubotu Jehova. Tulaswaangana antoomwe mumbungano kutegwa ‘tuyiisigwe a Jehova.’ (Is. 54:13) Mbunga yakwe ilibikkide pulogilamu iyaabuzumanana yakwiiya Bbaibbele yalo iituswenya kulinguwe alimwi akutupa lugwasyo lugwasya mukubelesya “zyoonse Leza nzyayanda.” (Mili. 20:27, Ci; Lk. 12:42) Miswaangano itupa luzibo lwakuyiisya Jwi lya Leza. Ziibalusyo kuzwa mu Magwalo zitugwasya kubaa bulongwe bubotu abamwi alimwi a Jehova lwakwe. Lusyomo lwesu lulayumizigwa ciindi notuyanzanaa bantu bamuyanda Leza.—Rom. 1:11, 12.
3 Amubatambe Cakubagama: Kutalikila aciiyo citaanzi, amumutambe sikwiiya Bbaibbele umwi aumwi kumiswaangano. Amumukulwaizye kubaa luyandisisyo kwiinda mukumwaambila kaambo kamwi kakamukulwaizya nkomwakamvwa kumuswaangano wamana alimwi amulange-lange kaambo kamwi kayoobandikwa kumuswaangano uutobela. Amwaambe mboibede Ŋanda ya Bwami alimwi akubona kuti wakuziba nkoijanika.
4 Ikuti naa sikwiiya takonzyi kusika kumuswaangano aciindi eco, amuzumanane kumutamba. Amube aciindi mvwiki amvwiki cakumutondezya mboyeendelezyegwa mbunga yesu. Amubelesye broshua litegwa Jehovah’s Witnesses—Who Are They? What Do They Believe? alimwi ikuti kacikonzeka amumutondezye avidiyo ya Jehovah’s Witnesses—The Organization Behind the Name ikutegwa mumuzibye mbotubede alimwi amiswaangano yesu. Amutolelezye basikumwaya bambi kutegwa sikwiiya azibilane ambabo. Amumulumbe Jehova kwiinda mumupailo kujatikizya mbunga alimwi amwaambe nzyayandika sikwiiya ikutegwa awalo kayanzana anjiyo.
5 Mutawayiwayi ikubagwasya bapya kutegwa kabaswaangana andiswe. Mbobayaabutondezya kulumba kwabo kuli Jehova, bayookulwaizigwa kubelesya zintu nzyobayiiya akuba umwi wambunga ya Leza iikamantene.—1 Kor. 14:25.