Kabbokesi Kamubuzyo

◼ Ikuti naa siŋanda wapa cakusanga cipati, sena eci ceelede ikutupa kuti tumupe mabbuku aambi?

Peepe. Mulakonzya kubelesya busongo mumakani aaya kumwi kamubikkilide maanu kuluyandisisyo ndwatondezya mukubala mabbuku aayo. Munyendo zitobela, mulakonzya kuyoomusiila mabbuku aambi aakonzya kumugwasilizya mumbazu zigaminide mwayandika lugwasyo. Ikuti naa siŋanda waliyeeyela kusanga alimwi, oko kulakonzya kutambulwa cakulumba. Kamuyeeya kuti, kunze lyakumwaya mabbuku, izyakusanga eezyi zigwasilizya zibeela ziindene-indene zyamulimo wesu wanyika yoonse zyalo izibikkilizyaa pulogilamu yamayake, kugwasilizya bamisyinali alimwi amulimo wabapainiya baalubazu.