Nkaambo nzi Ncobaucitila?
1 Kwakasinsimwa kuti ‘busungu bwakuŋanda ya Leza buyoomulya Kristo.’ (Int. 69:9) Akaambo kabusungu mbwaakajisi Jesu kubukombi bwakasimpe bwa Jehova wakacita kuti mulimo wabukambausi ube wakusaanguna. (Lk. 4:43; Joh. 18:37) Busungu mbubwena oobu bwakupa bukamboni ku kasimpe bulalibonya mazubaano mumulimo wa Bakamboni ba Jehova. Mwaka wamulimo wamana, ibasika amweelwe waakati-kati wa 645,509 nyika yoonse mboizulwa, bakacita mulimo wa bupainiya mweezi amweezi. Akaambo kakulyaaba kwesu kuli Leza, umwi aumwi wandiswe kwiinda mumupailo weelede kuyeeya mbocinga cilakonzeka kujana ciindi muzyakucita zyakwe zyakumubili kutegwa abeleke mububapainiya bwakugwasilizya nebuba bwalyoonse.—Int. 110:3; Muk. 12:1; Rom. 12:1.
2 Akaambo kakukkala mubweende bwazintu muntu amuntu mwayandisya kuvwuba, banji cilabayumina kumvwa kaambo muntu ncanga ulabeleka canguzu kapati mumulimo wamumuunda uutavwolwi amali aakuligwasya alimwi uutaleteli abulemu. Nkaambo nzi bapainiya ncobaucitila? Balizi kuti banjide mumulimo uuvwuna buumi bwa bantu. Icibapa kuyandisisya kucita mulimo oyu iwakuvwuna buumi, nduyando lupati umwi aumwi ndwajisi kuli Jehova akumuntunyina. (Rom. 1:14-16; 1 Tim. 2:4; 4:16) Bapainiya banabukwetene bamwi bakacaamba kabotu eeci mukufwiinsya nobakalibuzya kuti: “Nkaamboonzi ncotucitila bupainiya? Sena inga twamupa kaambo kamvwika Jehova ikujatikizya ncotutacitili bupainiya?”
3 Ikujatikizya kusala nkwaakasala kuti atalike bupainiya, umwi mucizyi wakalemba kuti: “Imebo amulumaangu twakayeeya kuti umwi aleke incito yakumubili, aboobo kwakali kuyandika kuliimya kuzintu zitayandiki cini-cini mubuumi. Pele, Jehova wakatulongezya cini-cini, tanaakatulekelela kuti tube bacete nekuba kuba babulide. . . . Ndakakajana kaambo keni-keni kakuponena—kalo kali nkakugwasya babulide munzila yakumuuya kuti bazibe kuti Jehova, Leza wakasimpe, tali kule kuli baabo bamuyandaula.” Mbwaanga balibwene kuti ciindi ciceede ncisyoonto, bapainiya balikkomene azintu ziyandika cini-cini mubuumi nzyobajisi pele kumwi kabasola kapati ikujana lubono lwakumuuya luyakubawo kukabe kutamani.—1 Tim. 6:8, 18, 19.
4 Ikuti naa bukkale bwenu bulamuzumizya, nkaamboonzi ncomutajatani amyaanda-myaanda yazyuulu yabakwesu abacizyi munyika yoonse mboizulwa bacita bupainiya? Munzila eeyo mulakonzya kujana lukkomano mbuli ndobajisi.