Ikubyala Cakuvwuzya Kuletela Zilongezyo Zitaliboteli
1 Swebo toonse tulombozya ciindi noziyoozuzikizyigwa zisyomezyo zitaliboteli zili mu Jwi lya Leza. Noliba lino, Jehova ulapa zilongezyo zinji zyalo zipa kuti bukkale bwesu kabukondelezya. Nokuba boobo, ikugwasyigwa kwesu cakutugama buya kuyeeme kapati aakusolekesya nkotucita. Ikweelanaa mbwaakaamba mwaapostolo Paulo, “oyo uubyala cakuvuzya ulatebula cakuvuzya.” (2 Kor. 9:6) Amulange-lange mbazu zyobile oomo njiisyo eeyi moibeleka.
2 Mulimo Wesu Aumwi Kumugama: Kukambauka makani mabotu kubantu kufwumbwa ciindi notukonzya kupa bumboni kuletela bulumbu bunji. (Tus. 3:27, 28) Cikkomanisya ncakuti, ibanji bali mukubyala cakuvwuzya kwiinda mukuyungizya ciindi ncobatola lubazu mumulimo, kubikkilizyaa mulimo wabupainiya bwakugwasyilizya naa bwaciindi coonse. Swebo toonse tulakonzya kubyala cakuvwuzya kwiinda mukubikkila maano mukupilukila kutegwa luyandisisyo mubantu mbotujana luyaambele alimwi akubalomba kubaa ciiyo ca Bbaibbele kufwumbwa notwajana coolwe cakucita boobo. (Rom. 12:11) Ikubeleka canguzu munzila eezi kujanya zyakuluula zikulwaizya alimwi alukkomano lunji mumulimo wesu.
3 Kutolaambele Makani aa Bwami: Paulo wakali kwaamba ‘kubyala cakuvwuzya’ ciindi naakali kwaamba makani aakupa zintu zyakumubili. (2 Kor. 9:6, 7, 11, 13) Sunu, kuli zintu zinji nzyotukonzya kucita kutegwa tutolaambele makani aa Bwami, tulakonzya kucita oobo kwiinda mukubelesya nguzu zyesu alimwi akubelesya zintu zyakumubili. Tulakonzya kugwasya kuyaka Maanda aa Bwami alimwi a Maanda Aakucitila Miswaangano Mipati. Alimwi tulakonzya kulisungula kutola lubazu mukusalazya alimwi akubamba masena aaya aakucitila bukombi bwakasimpe. Kuyungizya waawo, tulakonzya kusanga mali aakubelesya mumbungano nyenzi alimwi akumulimo wakukambauka Bwami nyika yoonse mbwiizulwa amumulimo wakugwasya bantu kuba basikwiiya. Elo tulakkomana kapati kaka notubona zilongezyo zinji zyatupa Jehova ciindi notucita mulimo wakwe ooyu ngwatupede alimwi anotuzumanana toonse kucita lubazu lwesu!—Malk. 3:10; Lk. 6:38.
4 Ijwi lya Leza litukulwaizya ‘kucita milimo iiluzi, kuba bavwubi mukumana milimo mibotu akufwambaana kupa akwaabilana abeenzuma.’ Mbotuya buzumanana kutobela kukulwaizyigwa ooku, tunooli azilongezyo zitaliboteli. Alimwi tuli ‘mukuliyobweda intalisyo imbotu yaciindi ciza, kuti tujatisye buumi bwini-bwini’ oobo buli kumbele.—1 Tim. 6:18, 19.