‘Kamufwambaana Kupa Akwaabilana Abeenzinyoko’
1 Myaanda yamyaka yainda imwaapostolo Paulo wakalailila Timoteo kuti akulwaizye basyominyina “kuti bacite milimo iiluzi, kuti babe bavubi mukumana milimo mibotu, kuti kabafwamba kupa akwaabilana abeenzinyina.” (1 Tim. 6:18) Paulo alimwi wakaibalusya Banakristo bana Hebrayo ikutaluba “kucita zibotu akugwasyanya” (Bahi. 13:16, Ci) Ino nkaambo nzi ncaakaalembela malailile aaya? Nkaambo wakalizi kuti kuyooba “bulemu akulemekwa aluumuno kuliboonse bacita bubotu.”—Rom. 2:10.
2 Akaambo kakuti ngo Mulengi wazintu zyoonse, Jehova Leza ngo Mwini wazyoonse. (Ciy. 4:11) Tulamulumba kapati kuzintu zyoonse nzyali mukutucitila azintu zyakwe. Nokuba kuti ibanabunji bajisi ciyanza cakutalumba, Mupatikampatila wazumanana kubazumizya boonse bantu kuti bagwasigwe azipego zyakwe izipa buumi. (Mt. 5:45) Wakasika aciimo cakwaaba Mwaanaakwe ngwayandisya kapati kuba cituuzyo kutegwa tukonzye kubaa buumi butamani. Sena luyando oolu ndwaakatutondezya talutukulwaizyi kumulumba kwiinda mukuba bantu bafwambaana kupa ibantuma?—2 Kor. 5:14, 15.
3 Ino Ncinzi Ncotukonzya Kwaabilana? Ncibotu ikubelesya kufwumbwa zintu nzyotujisi munzila iikkomanisya Leza. Masimpe, tuyanda kuti tugwasilizye mulimo wa Bwami wanyika yoonse kwiinda mukupa zintu zyakumubili alimwi amunzila yakumuuya. Inzya, makani mabotu ndubono lujisi mpindu kapati muntu umwi aumwi ndwakonzya kujana, nkaambo “ninguzu zya-Leza zyakufutula.” (Rom. 1:16) Kwiinda mukufwambaana ikubelesya ciindi cesu alimwi azintu nzyotujisi mwezi amwezi mukutola lubazu mumulimo wakukambauka alimwi akuyiisya, tuyoocikonzya ikwaabila bamwi lubono oolu lwakumuuya, lwalo luyoobapa kuti bakajane buumi butamani.
4 Jehova ulakkomana eelyo notugwasya baabo ibajisi buyumuyumu mukujana nzyobayandika. Ulatusyomezya kuti uyootulongezya alimwi ulatwiibalusya kuti: “Imbono tazigwasyi mubuzuba bwabukali, pele bululami bulavuna kulufu.” (Tus. 11:4; 19:17) Ikugwasilizya mumulimo wa Bwami kwiinda mukupa zintu alimwi akutola lubazu mukukambauka makani mabotu nenzila mbotu njotukonzya kutondezya kuti ncobeni tulafwambaana akuti tulilibambilide ikwaabilana.