Ipulogilamu Mpya ya Muswaangano Wabbazu
1 Ikutegwa tucikonzye kwiima cakutazungaana mulusyomo munyika eeyi mwalo bukkale mobuyaabucinca-cinca, tweelede kusyoma muli Jehova. Ino mbuti mbotukonzya kutondezya lusyomo oolu mubukkale bwesu bwabuzuba abuzuba? Ino kusyoma muli Jehova kubujatikizya buti buumi bwesu alimwi abwamukwasyi wesu? Mbuti mbolukonzya kutugwasya kutegwa tukukazye kuyunga kwanyika ya Saatani? Ipulogilamu yamuswaangano wabbazu yamumwaka wamulimo wa 2003 iyooyingula mibuzyo eeyi. Uujisi mutwe wakuti, ‘Amusyome Muli Jehova Akucita Kabotu.’—Int. 37:3.
2 Ilusyomo ndotujisi muli Jehova talweelede kutondezyegwa buyo muziindi zyaalubazu naa eelyo notuyandide kapati kugwasyigwa. Lweelede kuzyijatikizya mbazu zyoonse zyabukkale bwesu bwabuzuba abuzuba. Ikaambo aaka kalikankaizyidwe mumakani aakusaanguna aakuti, ‘Amusyome Jehova Ciindi Coonse.’ (Int. 62:8) Imakani aakusiilana aajisi zibeela zyone aakuti, “Ikutondezya Lusyomo Muli Jehova” ayootutondezya mbotukonzya kujana alimwi akutobela makani aazwa mu Bbaibbele aakonzya kutugwasya kubaa mukwasyi uuzwidilila, ikumana mapenzi aaboola mumukwasyi alimwi akuzuzikizya zintu nzyotuyandika munzila yakumubili.
3 Saatani abantu bakwe balasola kutupa muzeezo uupilingene kujatikizya cintu cibotu acibi alimwi akunyonganya zintu kutegwa zitazyibwi kabotu ziyandika azitayandiki. (Is. 5:20) Imakani aakuti, “Amuzicenjelele Zintu Zitayandiki Mubuumi” alimwi aakuti “Amuzitantamuke Zintu Zibyaabi—Amucite Zintu Zibotu” ayooyumya makanzeesu aakuzumanana kutobela zyeelelo zya Jehova zisumpukide.—Am. 5:14.
4 Iciindi Jehova aakubunyonyoona bweende bwazintu oobu bubyaabi, babelesi ba Leza bayooyandika kusyoma mulinguwe cakumaninina. Makani aaya ayootondezyegwa mumakani aabuleya aakuti, “Lufwutuko Kuzwa Kumapenzi Aamunyika Lulaafwaafwi.” Kuzwawaawo, tuyoolombwa kuti tulilingule tobeni mucibeela cakuti, “Sena Muyooyelela Kuba mu Bwami bwa Leza?” Ipulogilamu iyoomanaa makani aakulwaizya aakuti, “Amusyome Muzisyomezyo zya Jehova.”
5 Icibeela cipati camuswaangano umwi aumwi mmakani aalubbapatizyo. Boonse aabo bayanda kuyoobbapatizyigwa beelede kuzyibya mulangizi weendelezya cakufwaambana kutegwa kucitwe bubambe bweelede.
6 Mubukkale obuno bwakudooneka, alikke Jehova nguukonzya kusyomwa alimwi mulinguwe motukonzya kuliiba. (Int. 118:8, 9) Toonse atuyumye lusyomo lwesu mulinguwe kwiinda mukuyoojanika muzibeela zyapulogilamu yoonse yamuswaangano wabbazu.