Kabbokesi Kamubuzyo

◼ Ino mbubotu nzi buliko mukuswaangana ambungano iili acilawo motukkede?

Kwiinda mububambe bwambungano, tulakulwaizyigwa kutegwa ‘tuyandane akucita milimo mibotu.’ (Heb. 10:24, 25) Kwiinda mumbungano, tulaiya kasimpe alimwi kuzulila kutegwa tuzuzikizye mulimo wesu wakugwasya bantu kuba basikwiiya. (Mt. 28:19, 20) Kuyungizya waawo, tulakulwaizyigwa kuliyumya cakusyomeka mumasukusyo alimwi tulijisi balangizi basiluyando ibakonzya kutugwasya kuzwidilila mubuyumuyumu akulibilika mumakatazyo ayaabwiindilila. Cakutadooneka, imbungano ilayandika kapati kutegwa tuzumanane katusimide munzila yakumuuya. Nokuba boobo, sena kuli bubotu buliko bwakuswaangana ambungano iili acilawo motukkede?

Ibukkale bwaumwi aumwi buliindene alimwi izintu mbuli mulimo wakumubili, mweenzuma wamulukwatano uutasyomi alimwi azyakweendela zilakonzya kweendelezya kusala kwesu kujatikizya mbungano nkotweelede kunoojanika. Pele, kuli twaambo buya tubotu munzila yakumuuya alimwi azimwi zyigwasya eelyo muntu nayanzana ambungano iili acilawo mwakkede. Baalu balakonzya kubasikila cakufwambaana basikumwaya boonse ciindi nokwacitika zintu ziyandika kulanganya cakufwambaana. Tubbokesi Twamibuzyo mumyaka yainda twakatondezya bubotu abumwi ibuliko.—May 1991 alimwi a July 1976.

Ikanjikanji, cileelela kapati kujanika kumiswaangano iili afwaafwi, eeco cikonzya kutugwasya kufwambaana kusika kutegwa tubandike abantu bamwi, kulanganya zintu zimwi ziyandika kapati alimwi akutola lubazu mukwiimba lwiimbo lwakusaanguna alimwi amupailo. Eelyo bapya ibali aluyandisisyo nobakkala mucilawo motukkede, ibunji bwaziindi ncuuba-uba kapati kulindiswe kubasikila, kweendelezya ziiyo zya Bbaibbele kulimbabo alimwi akubatola kumiswaangano iili afwaafwi ankobakkala.

Tulaa lusyomo lwakuti basilutwe bamikwasyi kwiinda mukupaila balaalanga-langa makani aaya, akubikkila maano kulanga-langa twaambo toonse tujatikizyidwe eelyo nobasala icikonzya kugwasya kapati kumikwasyi yabo munzila yakumuuya alimwi akumubili.—1 Tim. 5:8.