Kabbokesi Kamubuzyo
◼ Ino ndilili nokuyandika kubamba nkamu iibelesya mulaka wakunze aacisi?
Ciindi mbungano noijisi cilawo cijisi bantu banji babelesya mulaka wakunze aacisi, ibaalu beelede kusolekesya kucita bubambe bwakukambauka mumulaka ooyo. (km 7/02 p.1; km 2/98 pp. 3-4) Cilakonzya kuba kuti bantu bakanana mulaka ooyo balimwaikide muzilawo zyambungano zyobilo naa ziinda aawo izibambene. Ikuti kacili boobu, mulangizi wabbazu naa balangizi bamabbazu baya kwaamba mbokweelede kucitwa ikutegwa bagwasye mbungano eezyo kukwelelaamwi mumulimo wakukambauka. Ziindi zimwi, makani aabuleya naa Ciiyo ca Ngazi Yamulindizi cilakonzya kucitilwa mubusena oobu kutegwa mweelwe wabantu bajanika kumuswaangano mumulaka ooyo ukonzye kuzyibwa.
Inkamu yabantu babelesya mulaka wakunze aacisi ilakonzya kubambwa ikuti naa: (1) Kuli basikumwaya naa ibantu batondezya luyandisyo ibakonzya kumvwa makani mabotu mumulaka wakunze aacisi. (2) Kuli mwaalu naa mukutausi weelela uukonzya kweendelezya muswaangano nuuba omwe buyo akati kayeeyo iicitwa mumvwiki. (3) Ikabunga kabaalu kalilibambide kugwasya nkamu eeyo. Ikuti naa twaambo ootu twalangwa-langwa, ibaalu beelede kuzyibya ofesi yamutabi ikutegwa nkamu eeyi izyibwe mumulawo alimwi akupa malailile aambi.
Inkamu zinji zilatalika kwiinda mukucita Ciiyo Cabbuku Cambungano amvwiki. Kumbele, baalu balakonzya kuzumizya kucita miswaangano aimbi mbuli makani aabuleya alimwi a Ciiyo ca Ngazi Yamulindizi. Makani No. 2, 3 alimwi a 4 mu Cikolo Camulimo Weendelezyegwaa Leza, alakonzya kucitwa mucikolo cimwi ikuti naa kuli mwaalu naa mukutausi weelela alimwi uuzyi kabotu mulaka ooyo uukonzya kuba sikupa lulayo. Nokuba boobo, inkamu inga yasangana mbungano nokubandikwa makani aalulayo, kunomoona twaambo tupati-pati alimwi amu Muswaangano Wamulimo. Imuswaangano wakulibambila kuunka mumulimo wamumuunda awalo ulakonzya kubambilwa nkamu eeyo.
Boonse ibali munkamu beelede kweendelezyegwa akabunga kabaalu. Ibaalu beelede kupa busolozi bweelede alimwi akubikkila maanu kapati kulanganya ziyandika kunkamu eeyo. Ciindi mulangizi wabbazu naswaya mbungano iigwasya nkamu eeyo, awalo uyoocita bubambe bwakuti abeleke anjiyo ikutegwa akonzye kubayaka kumuuya. Kwiinda mukulongezyegwa a Jehova, ibantu bakanana mulaka wakunze aacisi balakonzya kubamba mbungano mukuya kwaciindi.