Amubayiisye Mwaambo Uusalala Bantu
1 Nokuba kuti bazwa ‘kuzisi, akumisyobo akumikowa akumyaambo’ minji kapati, Bakamboni ba Jehova mbantu bakamantenyi, oobu mbunyina bwini-bwini bwanyika yoonse. (Ciy. 7:9) Munyika yasunu iitakamantenyi, eeci ncintu cigambya kapati. Ino eeci cikonzyeka buti? Nkaambo kakuti ‘twakapegwa mwaambo uusalala.’—Zef. 3:9.
2 Ibubotu Bwajanika Akaambo Kamwaambo Uusalala: Ino ooyu mwaambo uusalala ninzi? Nkukamvwisya kabotu kasimpe kajanika mu Jwi lya Leza kaamba zya Jehova alimwi amakanze aakwe, ikapati kujatikizya Bwami bwa Leza. Kweelana ambuli Jesu mbwaakasinsima, kasimpe aaka kali mukumwaigwa kwiinda mukubelesya nzila iilibonya ameso yaanyika ya “muzike musyomesi uucenjede,” cakunga bantu ‘bamyaambo yoonse yaanyika’ bali mukubuzumina bukombi bwakasimpe.—Mt. 24:45; Zek. 8:23.
3 Ibantu mbobayaabwiiya mwaambo uusalala, cabagwasya kupona buumi buli kabotu kweelana azyeelelo zya Jehova. Balaiya kuba bantu bajisi “lukamantano lwamoyo omwe alwamiyeeyo yomwe.” (1 Kor. 1:10) Ikuyiisya kwa Leza kupa kuti bantu aabo batalike kulilemeka kabotu akuba amizeezo iili kabotu alimwi akwaamba zyamasimpe, ikapati ciindi nobaambila bamwi makani mabotu. (Tit. 2:7, 8; Heb. 13:15) Ikucinca kubotu boobu kuletela bulemu kuli Jehova.
4 Mucikozyanyo, imwaalumi umwi wakajisi mibuzyo minji wakaswaangana asikumwaya walo wakamukambaukila makani mabotu. Imibuzyo yakwe yoonse yakaingulwa kwiinda mukubelesya Bbaibbele. Akaambo kakwaakkomanina makani ngaakamvwa, wakatalika kwiiya ziindi zyobilo amvwiki alimwi wakatalika kujanika kumiswaangano. Wakagambwa kubona mbuli mbwaakatambulwa camaanza obilo ku Ŋanda ya Bwami, nkaambo ibakajanika ooko bakali bamisyobo iindenyi-indenyi. Muciindi buyo cisyoonto, walo alimwi amukaintu wakwe bakacinca bukkale bwabo, eelyo bakabapatizyigwa. Kuzwa ciindi eeco, wagwasya bantu babalilwa kuma 40 kubelekela Jehova kubikkilizya abanamukwasyi banji. Nokuba kuti mmuntu uuciswa-ciswa, taliningalampa pe kuzwa ciindi naakatalika kubeleka kali mupainiya.
5 Ikuyiisya Bantu: Zintu zicitika munyika zipa kuti bantu basyomeka bakulange-lange kuyeeya kwabo alimwi abuumi bwabo. Mbubwenya mbuli bwakali Jesu, tweelede kuyandisya kubagwasya. Ikucita nyendo zyakupilukila munzila iibeleka kabotu alimwi akusololela ziiyo zya Bbaibbele nzintu ziyandika kapati mukugwasya baabo basyomeka kutegwa baiye mwaambo uusalala.
6 Inzila imwi iibeleka kabotu kubantu bajisi bubi njakucita ciiyo ca Bbaibbele kamuli amulyango wabo. (km 5/02 p. 1) Sena kuli nomwakaisolede kale? Nomulibambila lweendo lwakupilukila, amusale nzila iikonzya kubeleka kabotu kuli mukamwiniŋanda kuzwa mupepa lyamukati lya Mulimo Wesu Wabwami wa January 2002. Ibunji bwanzila izili mupepa lyamukati eeli zyakabambwa ikutegwa cikonzyeke kutalisya mubandi mubroshuwa ya Ncayanda naa mubbuku lya Luzibo. Amwiinduluke nzila eeyo kutegwa muzumanane kabotu kukutalisya mubandi mumuncali umwi. Amusale lugwalo lomwe naa obilo aali mumuncali ngomweelede kubala akubandika alimwi akulibambila mubuzyo kuzwa kumakani ngomwabandika. Ikucita boobu kuyoogwasya ikutegwa mukajane aakutalikila mumuncali ngomulibambide kuyoobandika mwaakuswaya alimwi.
7 Bantu ba Jehova bali mukujana zilongezyo zinji kapati akaambo kakwiiya mwaambo uusalala. Aboobo cabunkutwe atubagwasye bantu kutegwa batusangane ‘mukukwiilila izina lya Jehova’ alimwi ‘akumubelekela calukamantano.’—Zef. 3:9.