Ikugwasya Aciindi Ceelede
1 Iciindi imwaapostolo Petro naakabona kuti cilayandika kubakulwaizya basyominyina, ikubabikkila maano kwakamupa kuti abayeezye caluyando alimwi akubayumya-yumya. (2 Pet. 1:12, 13; 3:1) Wakabakulwaizya aabo ‘bakajisi lusyomo’ kuti bazumanane abube bwakumuuya ikutegwa batabi “batolo nanka kubula micelo mukuzibisya Mwami wesu Jesu Kristo.” (2 Pet. 1:1, 5-8) Makanze aa Petro akali aakubagwasya kuba basinizyide mukwiitwa alimwi akusalwa kwabo kuli Jehova kutegwa ‘bakajanwe muluumuno, kabatakwe kabala nokaba kampenda mumeso aa Leza.’ (2 Pet. 1:10, 11; 3:14) Kukulwaizya kwakwe kubasyominyina banji lwakali lugwasyo lwakapegwa aciindi ceelede.
2 Imazubaano, balangizi Banakristo abalo balibikkide maano kapati kubantu ba Leza. “[Mu]ziindi zikataazya” eezi, babelesi ba Jehova banji balaliyumya mubukkale bukatazya. (2 Tim. 3:1) Akaambo kakuti cilakatazya kapati kujana mali, mapenzi mumukwasyi naa mapenzi amwi ngakonzya kujana muntu, bamwi balakonzya kulimvwa mbubonya mbwaakalimvwa Davida naakati: “Zibi zitakonzya kubalwa zilindizyuungulukide, milandu yangu yandeenzya, lino ndakacilwa kubona, minji loko kwiinda masusu aakumutwe wangu, moyo wangu wawizuka.” (Int. 40:12) Mapenzi aaya alakonzya kuvwula cakunga bantu bali boobo balakonzya kuleka kubikkila maano kumikuli yakumuuya iiyandika kapati alimwi akuleka kutola lubazu cabusungu mumulimo wa Bunakristo. Pele, nokuba kuti bali mumapenzi, ‘tabailubide milawo ya Jehova pe.’ (Int. 119:176) Ecino nceciindi baalu ncobeelede kugwasya bantu bali boobo.—Is. 32:1, 2.
3 Ikutegwa bazuzikizye mukuli ooyu, baalu bakulwaizyigwa kubeleka canguzu kutegwa babagwasye aabo ibatacisungweede kutola lubazu mumulimo wabukambausi. Makanze mapati aakuzuzikizya mulimo ooyu akatalika kale alimwi ayoozumanana mane kusikila kumamanino kwamwezi wa March. Balangizi baziiyo zyabbuku balombwa kuswaya bantu batacisungweede akubagwasya kumuuya kutegwa batalike alimwi mulimo wabo ambungano. Ikuti kakuyandika, ciiyo ca Bbaibbele cilakonzya kutalisigwa. Basikumwaya bamwi balakonzya kulombwa kuti bagwasye. Ikuti naa mwalombwa kuti mucite boobo, mulimo wanu uyoogwasya kapati, ikapati ciindi nomumukulwaizya caluzyalo.
4 Toonse cilatukkomanisya eelyo umwi nabukulusya milimo yakwe mumbungano. (Lk. 15:6) Milimo yesu yakukulwaizya baabo batacisungweede ncobeni ilakonzya kuba “majwi aambwa kuciindi ceelede.”—Tus. 25:11.