Ijwi lya Leza Nkasimpe
1. Mmakani nzi mapati ajanika mu Bbaibbele?
1 Sintembauzyo wakalemba kuti, “Mitwe yamajwi aako [nkasimpe].” (Int. 119:160) Kwiinda mu Jwi lyakwe lyakasololelwa amuuya, Jehova ulapa bwiinguzi bugwasya kumibuzyo iiyandika kapati yabuumi. Ulapa luumbulizyo alimwi abulangizi kuli baabo ibali mumapenzi. Alimwi ulatondezya mbuli mbotunga twaba balongwe bakwe. Imukaintu uumwi wakati, “ikwiiya kasimpe kamu Bbaibbele cili mbuli kuti mwazwa muŋanda muli mudima uusiya mbi akuunka muŋanda iijisi mumuni.” Sena mulasoleka kwaambila bantu kasimpe ka Jwi lya Leza nomwajana ciindi?
2. Ino mbuti Bbaibbele mbolicinca buumi bwabantu?
2 Inguzu zya Bbaibbele Zyakucinca Alimwi Akukwelelezya Bantu: Kasimpe kamu Bbaibbele kalijisi nguzu zikonzya kuyasa moyo akucinca buumi bwabantu. (Heb. 4:12) Imukaintu mwana-mwana uutegwa Rosa wakaba muntu muvwuule, mudakwi akubelesya misamu iikola. Waamba kuti, “buzuba bumwi nondakatyompedwe kapati, Bakamboni banabukwetene bakandibandikila Ibbaibbele mbolikonzya kutugwasya kumana mapenzi ngotujisi. Ndakatalika kwiiya Jwi lya Leza lyalo ndondakajana kuti lilakkomanisya. Mumwezi mumona ndakakonzya kulondola nzila zyangu akupona buumi bupya. Lino mbwaanga buumi bwangu bulaampindu, kunyina nondeendelezyegwa abukoko naa amisamu ikola. Alimwi mbwaanga ndakali kuyandisya kuba mulongwe wa Jehova, ndakakanza kupona kweelana azyeelelo zyakwe. Ikuti nibwatali busongo bwa Jwi lya Leza bugwasya, masimpe kusikila sunu nindakalijaya kale.”—Int. 119:92.
3. Ino nkaambo nzi ncotuteelede kuwayawaya kukanana mulumbe uzwa mu Bbaibbele kubantu?
3 Ikwiindana amabbuku aasunu, Ibbaibbele lilabakkomanisya bantu ‘boonse bazwa kuzisi zyoonse akumisyobo yoonse akumikowa yoonse alimwi akumyaambo yoonse.’ (Ciy. 7:9) Leza uyanda kuti “bantu boonse bafutulwe akuboola kuluzibo lwakuziba lusinizyo.” (1 Tim. 2:4) Aboobo, tatweelede kwiinda kuyeeya kuti muntu takonzyi kwaatambula makani mabotu akaambo kambwaakakomena. Pele, atukanane mulumbe wa Bwami kubantu boonse, katubelesya twaambo tuzwa mu Bbaibbele nokwayandika.
4. Ino mbuti mbotunga twalibelesya Bbaibbele ciindi notupa bumboni?
4 Amukankaizye Magwalo: Kuli ziindi zinji nomukonzya kubelesya Bbaibbele mumulimo. Eelyo nomwaabila mamagazini, amusoleke kubikkilizya alugwalo lujanika munzila eeyo iipedwe. Eelyo nomubelesya bbuku liyooabilwa mumwezi, bamwi cilabagwasya kubala lugwalo ndobasalide mumajwi aabo aakumatalikilo. Lyoonse nomupilukila, amubale lugwalo lomwe naa aayinda aawo mu Bbaibbele kutegwa mumugwasye mwiniŋanda kuyaambele mukujana luzibo lwini-lwini. Eelyo nomweendelezya ciiyo ca Bbaibbele, amugamike mubandi wanu kumagwalo aajisi twaambo tuyandika. Nomuli mubukambausi bwamukwiizya, amulijatile mumaanza Bbaibbele kutegwa mulibelesye nomwajana ciindi cakupa bumboni bwamukwiizya.—2 Tim. 2:15.
5. Nkaambo nzi ncotweelede kusolekesya kubelesya Bbaibbele mumulimo wesu?
5 Atubagwasye bantu kuti bagwasyigwe anguzu zikulwaizya zya Jwi lya Leza lyakasimpe kwiinda mukubelesya Bbaibbele ciindi coonse ncotwajana mumulimo wesu.—1 Tes. 2:13.