Nobakubusi—Amuliyakile Ntalisyo Mbotu Yakumbele
1. Ino nkaambo nzi Banakristo bakubusi ncobeelede kuba alusyomo luyumu?
1 Ino ncintu nzi cipati cili mumizeezo yanu? Ino ncinzi ncomuyeeya? Sena zintu nzyomubikkilide maano ziyeeme azintu zyamubweende obuno? Antela sena ziyeeme abuumi bwakumbele akubikkila maano kuzisyomezyo zya Leza? (Mt. 6:24, 31-33; Lk. 8:14) Lusyomo luyumu lulayandika kutegwa muntu atole ntaamu kuzisyomezyo zya Leza, mbubonya mbocikonzya kubonwa kucikozyanyo ca Abrahamu a Musa. (Heb. 11:8-10, 24-26) Ino mbuti mbomukonzya kutola ambele lusyomo luli boobo akuliyakila “intalisyo imbotu yaciindi ciza”?—1 Tim. 6:19.
2. Ino ncinzi ncotwiiya kucikozyanyo ca Mwami Josiya?
2 Amuyandaule Jehova: Ikuti kamujisi mulongo wazintu zyakumuuya zyakucita mumukwasyi wanu, eeci cili kabotu kapati. Pele mutayeeyi kuti ikuba amulongo buyo uuli boobo kuyoomupa lusyomo luyumu. Ikutegwa mujane “luzibo lwa-Leza,” ilwanu kumugama mweelede kuyandaula Jehova. (Tus. 2:3-5; 1 Mak. 28:9) Imwami mwana-mwana Josiya wakacita oobo. Nokuba kuti wakakomenena mubukkale bwatakali kabotu kumuntu uuyanda kuyaambele kumuuya, “wakatalika kuyandaula Leza wa-Davida wisi” naakali amyaka iili 15.—2 Mak. 34:3.
3. Ino mbuti Banakristo bana-bana sunu mbobakonzya kuyandaula Jehova?
3 Ino mbuti mbomunga mwamuyandaula Jehova? Nkwiinda mukulingaula cakubikkila maano nzyomusyoma alimwi ‘akusinizya’ kuti mbobwini. (Rom. 12:2) Mucikozyanyo, sena inga mwapandulula ncolyaamba Bbaibbele kujatikizya bulowa naa kutondezya kuti Bwami bwa Leza bwakatalika kulela kujulu mu 1914? Ikujana “luzibo [lwini-lwini]” ncibeela ciyandika kapati mukuyaka ntalisyo mbotu yakumbele.—1 Tim. 2:3, 4.
4. Ino mbuti basikumwaya batabbapatizyidwe mbobakonzya kuyaambele?
4 Ikuyandaula Leza nkwaakacita Josiya kwakaleta mpindu. Katanaba aamyaka iili 20, wakacita cabusicamba mukusalazya cisi kwiinda mukugwisya bukombi bwakubeja. (2 Mak. 34:3-7) Mbubwenya buyo, ikuyaambele kwanu kumuuya kuya kulibonya mumilimo yanu. (1 Tim. 4:15) Ikuti kamuli basikumwaya batabbapatizyidwe, amusolekesye kuyaambele munzila mbomubeleka mulimo wanu. Mutakkomanini buyo kumwaya mabbuku. Amulibikkile mbaakani yakubelesya Bbaibbele, kusalazyanya twaambo abantu alimwi akukomezya luyandisyo mubantu mbomwajana. (Rom. 12:7) Eeci ciyoomugwasya kukomena kumuuya.
5. Ino zyoolwe nzi zyakuyaambe mumulimo wabo ziliko ku Banakristo babbapatizyidwe?
5 Amupe Jehova Zintu Ziinda Kubota: Nomwatondezya kulyaaba kwanu kuli Jehova kwiinda mukubbapatizyigwa, mulaba mubelesi wa Leza. (2 Kor. 3:5, 6) Eeci cimujulila nzila zyakubelekela Jehova ciindi coonse. Nzila eezi zibikkilizya kucita bupainiya akubelekela ku Beteli, kucita bumisyinali amulimo wakubelekela mumasi aambi. Bakwesu batakwete ibabeleka kabali bakutausi naa baalu, balakonzya kulembela ku Cikolo Cakwiiya Mulimo. Azimbi nzila mbomukonzya kuyungizya mulimo wanu nkwiinda mukwiiya mwaambo uumbi naa kulongela kubusena kubulide.
6. Ino mbuti swebo toonse mbotukonzya kuliyakila ntalisyo mbotu yakumbele?
6 Masimpe, tabali boonse bakonzya kutola lubazu muzyoolwe zyamulimo eezyo, pele umwi aumwi wesu ulakonzya kupa Jehova zintu ziinda kubota. (Mt. 22:37) Kufwumbwa naa muli mubukkale buli buti, ikubelekela Jehova acibe ncecintu cipati mubuumi bwanu. (Int. 16:5) Kwiinda mukucita boobo, munooliyakila ntalisyo mbotu yakumbele.