Cikolo Cakwiiya Mulimo—Mulyango Mupati Wakucita Milimo
1 Kwiinda mumusinsimi Jeremiya, Jehova wakasinsima kuti: ‘Njoobabikkila bantu bangu beembezi bani kubeembela, aboobo tabakayoowi limbi nikuba kukankama nikuba kubulila.’ (Jer. 23:4) Mulimo ooyu wabweembezi ulacitwa sunu akati kabantu bamisyobo yoonse. Ulacitwa amakumi-makumi aazyuulu zyabaalu bambungano. Kunze lyaboobo, bakubusi banji bali mbuli madosi aamume, cakulisungula balyaaba mumulimo wa Jehova. (Int. 110:3) Elo kaka ncoolwe kuba abakwesu aaba babombe boobu mumbungano zyabantu ba Leza! Mbuuya buzumanana mulimo wakumuuya wakuyobolola, kuciyandika basankwa bajisi luzyibo kapati kulyaaba kubelekela ibanyina.
2 Ibubambe bubotu bwakuyiisya baalu abakutausi batakwete kuti bayungizyilwe mikuli mbwa Cikolo Cakwiiya Mulimo. Basicikolo bainda ku 22,000 kuzwa mumasi aasika ku 140 bajana lwiiyo oolu mumakkilasi aali 999 kuzwa cikolo nicakatalika mumwaka wa 1987. Kubakwesu aaba, masimpe cikolo calibonya kuba “mulyango mupati wakucita milimo.”—1 Kor. 16:9.
3 Makanze aa Cikolo: Makanze aa Cikolo Cakwiiya Mulimo ngakuyiisya basankwa basika kuzyeelelo kuti basime alimwi akulibambila kuba amikuli kufwumbwa nokwayandika mumbunga. Icikolo cibagwasya kuti bakonzye kusololela mumulimo wakukambauka, kutola lubazu mumulimo wakweembela butanga akuyiisya mumbungano. Bamanizya cikolo, bamwi balatuminwa mumulimo wabupainiya bwaalubazu naa kuba mulangizi weendeenda mucisi mweena antela kunze aacisi. Ibamwi balapegwa milimo yakubelekela mumbungano mobakazyila naa mumasena mumwi mubulide muyandika lugwasyo mucilawo camutabi.
4 Munsondo zili lusele, basicikolo balaiya zintu zinji kapati kujatikizya Bbaibbele. Cakubikkila maano balaiya mbazu zinji kujatikizya njiisyo zya Bbaibbele amikuli yabweembezi alimwi amalailile mbuli mbokweendelezyegwa mapenzi aamubuumi bwa Banakristo. Alimwi balaiya Magwalo ncaayiisya kumakani aabweendelezi, kubeteka, alimwi amakani aajatikizya mbunga. Balaiya nzila iilibedelede yakuba mwaambi wabuleya alimwi balagwasyigwa cacigaminina munzila yaalubazu kubagwasya kuya ambele kumuuya.
5 Ziyandika: Inzya, ziyandika zinji kuti muntu ajanike mucikolo eeci. Sikulilembya weelede kuti wakabeleka kali mwaalu naa mukutausi kutalela kumyaka yobilo iiccililana. Boonse beelede kuti kabatakwete alimwi kabajisi myaka iili 23 kusikila ku 50. Basikulilembya beelede kuti kabacizyi kubala, kulemba alimwi akukanana kabotu mulaka ooyo uubelesyegwa mucikolo. Alimwi beelede kuti kabataciswi-ciswi batayandiki kutalika kulwazyigwa naa kubalangauda cakulya caalubazu. Mucikolo eeci kuyandika buyo baabo bapainiya baciindi coonse.
6 Aabo balyaaba beelede kuti kabalisungude alimwi kabalibambide kubeleka kufwumbwa nkobayandika. Eeci ciyanda muuya mbuli wamusinsimi Isaya, walo cakutasowa ciindi wakalisungula kumulimo waalubazu akwaamba kuti: “Mpendi! Unditume mebo!” (Is. 6:8) Alimwi wakali kulibombya mubuumi bwakwe boonse. Aabo balilembya ku Cikolo Cakwiiya Mulimo, beelede kukulwaizyigwa akaambo kakuyanda bakwesu abacizyi kabajisi luyando lwakubabelekela ikutali kuti babe ampuwo naa zyuuno. Bamana kwiiya lwiiyo lubotu boobu, ncobalangilwa nkubelesya zyeezyo nzyobakaiya ikugwasya bamwi.—Lk. 12:48.
7 Mpindu: Munsondo zili lusele zyakwiiya kapati, basicikolo ‘balasaninwa amajwi aalusyomo alimwi anjiisyo yabwini.’ (1 Timo. 4:6, Ci) Eeci cipa kuti bazulile akukonzya kugwasya akuyumya-yumya bamwi mucilawo ncobabelekela cambungano alimwi amubbazu. Mumbazu zinji oomo bakamanizya Cikolo Cakwiiya Mulimo mobakatuminwa, mulimo wamumuunda waya ampela; mulimo wabupainiya wakulwaizyigwa ikapati kubana-bana. Alimwi kwaba kubikkila maano kubapya banji aumwi kumugama uujanika akati kabantu ba Leza.
8 Hena muli baalu batakwete naa bakutausi bali amyaka iili 23 kusikila ku 50? Ino mulekela nzi kulilembya mu Cikolo Cakwiiya Mulimo? Hena muli umwi wabakwesu uucili mwana uujisi makanze akuya kubeleka mumulimo wa Jehova? Ino mulekela nzi ma kuubya-ubya buumi bwanu alimwi akuleka zyeezyo zikonzya kumunyonganya kutegwa munjile mu “mulyango mupati wakucita milimo”? Ulakonzya kumupa kukkomana kapati alimwi akukkutila. Inzya, Cikolo Cakwiiya Mulimo ncikolo cabeleka kabotu akuletela zilongezyo ikutali buyo kuli basicikolo bamanizya cikolo, pele akumbungano yabantu ba Leza nyika yoonse.
Kabbokesi kali apeeji 3]
Mbobagwasyigwa Kulwiiyo
“Masimpe lwiiyo lwandigwasya kapati mumulimo wangu alimwi akukonzya kweembela butanga cabusongo kwiinda mukubelesya Magwalo.”
“Ciloko candigwasya munzila zinji kapati kuba muntu uukulwaide mukulanganya mikuli yangu iindenyi-indenyi mumbungano.”
“Candicinca mumbazu zinji zyabuumi bwangu kubikkilizya ambondilimvwa kububambe bwa Leza alimwi ambunga yakwe.”
“Lwiiyo lwakandigwasya kubona mbociyandika kulisungula kuya kubelekela kuyandika lugwasyo.”