Mbuti Bakamboni ba Jehova Mbobayiisyigwa Kuucita Mulimo Wabo?

Bakamboni ba Jehova bazumanana kuyiisyigwa mumbazu zyoonse zyabuumi bwa Bunakristo, calo cibikkilizya amulimo wabukambausi. Ooyu ngomulimo Jesu ngwaakaambila basikumutobela kuti bacite, ikukambauka akuyiisya makani mabotu aa Bwami bwa Leza. (Matayo 24:14; 28:19, 20) Tulalutambula lwiiyo oolu kumiswaangano yansondo ansondo, kumiswaangano yacooko alimwi ayabbazu. Bakamboni ba Jehova ibajisi mikuli mumbungano naa mumbunga balatambula lwiiyo alumbi kuzikolo zya Bbaibbele zyaalubazu.

Mucibalo eeci tulalanga-langa makani aatobela:

Ino ndwiiyo nzi ndobatambula Bakamboni ba Jehova?

Miswaangano yambungano. Nsondo ansondo, tulajanika kumiswaangano yobilo mumasena eesu aakukombela aaitwa kuti Maanda aa Bwami. Muswaangano umwi kanji-kanji inga ucitwa mukati kansondo, mpoonya uumbi kumamanino aansondo. Bantu boonse balakonzya kujanika alimwi takwiinzyigwi mbale yakulombelela mali.

Muswaangano wamukati kansondo. Tulaiya mbotukonzya kuyungizya luzyibo lwesu mukubala, kubandika abantu, kubandika kubuleya, kukambauka alimwi akuyiisya. Lwiiyo lulapegwa kwiinda mumakani, mibandi abaswiilizi, zitondezyo, alimwi amumavidiyo. Kuyungizya waawo lwiiyo oolu lulatugwasya kuba bamayi ba Bbaibbele bacibwene alimwi akutugwasya notusololela ziiyo zya Bbaibbele kuli baabo balaaluyandisisyo. Boonse aabo ibajanika kumiswaangano balagwasyigwa alwiiyo oolu. Kwiinda zyoonse, miswaangano yesu iyumya lusyomo lwesu muli Leza, luyando lwesu kulinguwe alimwi akubasyomima.
Muswaangano wakumamanino aansondo. Muswaangano ooyu uuli muzibeela zyobilo ulatalika amakani aa Bbaibbele alo aabambilidwe bantu boonse kwaambisya batali Bakamboni. Cibeela cabili camuswaangano ncamubandi abaswiilizi icizwa mucibalo cakamwaigwa mu Ngazi Yamulindizi yakwiiya.a Zibalo zilabandika akupandulula twaambo twamu Bbaibbele alimwi anjiisyo zitugwasya mubukambausi amubuumi bwesu.

Miswaangano yabbazu ayacooko. Mwaka amwaka tulaba amiswaangano mipati yotatwe, kwalo kujanika bantu bazwa mumbungano zinji. Miswaangano eeyi iikkomanisya kapati inga iyeeme amutwe uugaminide uuzwa mu Bbaibbele alimwi ilabikkilizya amakani, zitondezyo, kubuzya-buzya alimwi amavidiyo. Mbubwenya mbuli miswaangano yambungano, ayalo miswaangano yabbazu ayacooko iyungizya luzyibo lwesu lwa Bbaibbele akutugwasya kuba bakambausi babotu bamakani mabotu. Akwalo kumiswaangano eeyi, bantu boonse balakonzya kujanika alimwi takwiinzyigwi mbale yakulombelela mali.

Zikolo zya Bbaibbele zya Bakamboni ba Jehova

Kutegwa batambule lwiiyo luyungizyidwe, Bakamboni ba Jehova bamwi balatambwa kunjila zikolo zya Bbaibbele ziindene-indene. Ino nzikolo nzi eezyi? Ino zijisi makanze nzi alimwi zitola ciindi cilamfwu buti? Alimwi mbaani bakonzya kunjila?

Cikolo Camulimo Cabapainiya

Makanze: Nkuyiisya babelesi baciindi coonse, baitwa kuti bapainiya,b kutegwa bayungizye luzyibo lwabo mumulimo wakukambauka akuyiisya. Kkoosi eeyi ilabikkilizya amibandi yamukkilasi, zitondezyo, makani alimwi azyakucita.
Bulamfwu bwaciindi cakwiiya: Mazuba aali 6.
Bakonzya kunjila: Boonse ibakkwanya mwaka omwe kabali bapainiya balatambwa kunjila. Bapainiya ibabeleka kwaciindi cilamfwu balo bakkwanya myaka iili 5 kuzwa nobakanjide cikolo balakonzya kutambwa kunjila alimwi.

Cikolo Cabakambausi ba Bwami

Makanze: Nkupa lwiiyo lwaalubazu kubabelesi baciindi coonse. Basicikolo balayungizya luzyibo lwabo lwakukambauka akuyiisya, alimwi akwiiya twaambo twamu Bbaibbele cakulomya. Bunji bwabasikumanizya cikolo balatumwa mumasena mwalo imuyandika bakambausi.
Bulamfwu bwaciindi cakwiiya: Myezi yobilo.
Bakonzya kunjila: Bapainiya balakonzya kulembela kunjila cikolo ikuti kabasika azyeelelo ziyandika alimwi akuti bukkale kabubazumizya kuunka kufwumbwa nkobatumwa.

Cikolo Cabaalu Bambungano

Makanze: Nkugwasya baaluc kulanganya mikuli yabo mumbungano, mbuli kuyiisya, kucita bweembezi, kuyumya luyando lwabo kuli Leza alimwi alwabasyominyina.—1 Petro 5:2, 3.
Bulamfwu bwaciindi cakwiiya: Mazuba aali 5.
Bakonzya kunjila: Baalu bapya alimwi abaabo ibakkwanya myaka iili 5 kuzwa ciindi nobakanjide cikolo, balitambidwe kunjila.

Cikolo ca Balangizi Bamabazu Abamakaintu Babo

Makanze: Nkuyiisya balangizi beendeenda, balo ibaitwa kuti balangizi bamabazu,d kutegwa kabailanganya kabotu mikuli yabo. (1 Timoteyo 5:17) Kkoosi eeyi ilabagwasya baalu Banakristo abamakaintu babo kwaamvwisya kabotu Magwalo.
Bulamfwu bwaciindi cakwiiya: Mwezi omwe.
Bakonzya kunjila: Balangizi bamabazu bapya abamakaintu babo ibabeleka mwaka omwe mumumlimo wabo balatambwa kunjila. Kumane, balatambwa kunjila alimwi bakkwanya myaka iili 5 kuzwa nobakanjide musyule.

Cikolo Camulimo wa Bwami

Makanze: Nkugwasya abakutausie kulanganya mikuli yabo mumbungano kweelana abukkale buliko aciindi eeco, zicitika alimwi akulanganya nzyobayandika. (2 Timoteyo 3:1) Cikolo eeci cilacitwa kwainda myaka misyoonto.
Bulamfwu bwaciindi cakwiiya: Cilaindana-indana, kanji-kanji buzuba bomwe.
Bakonzya kunjila: Balangizi bamabazu, baalu, alimwi abakutausi.

Basikolo ba Cikolo Camulimo baimikila boonse kuti bakkopwe.

Cikolo Camulimo waa Beteli

Makanze: Nkugwasya baabo babelekela a Betelif kuzwidilila mumulimo wabo alimwi akuyumya luyando lwabo kuli Leza akuli umwi amweenzyinyina.
Bulamfwu bwaciindi cakwiiya: Mazuba aali 5 acisela.
Bakonzya kunjila: Babelesi bapya baa Beteli balatambwa kunjila. Abaabo ibabeleka kwaciindi cilamfwu, ibakkwanya myaka iili 5 kuzwa nobakanjide cikolo balakonzya kutambwa kunjila alimwi.

Sicikolo wa Cikolo Camulimo wa Bwami, upa makani mukkilasi.

Cikolo ca Watchtower Bible School of Gilead

Makanze: Nkugwasya basicikolo kuliyanda kapati akulimvwisya Jwi lya Leza alimwi akubagwasya kubelesya zintu nzyobaiya. (1 Batesalonika 2:13) Banakristo basimide kumuuya baalumi abamakaintu ibanjila cikolo ca Gilead balabelesyegwa kapati mumbunga ya Jehova alimwi amumulimo wanyika yoonse wakuyiisya bantu Bbaibbele. Basikumanizya cikolo balakonzya kutumwa kuyoobelekela mumuunda naa kuofesi yamutabi, kufwumbwa naa muucisi cabo naa kubusena bumbi buyo.
Bulamfwu bwaciindi cakwiiya: Myezi iili 5.
Bakonzya Kunjila: Bakumaofesi aamitabi balabatamba babelesi bamwi bamulimo waciindi coonse kuti balembele. Cikolo cicitilwa ku United States ku Watchtower Educational Center mu Patterson, New York.

Mwiiyi wa Watchtower Bible School of Gilead, ubelesya cikozyanyo ca tempele lya Jerusalemu kuyiisya basicikolo.

Cikolo ca Bamukkomiti ya Mutabi Abamakaintu Babo

Makanze: Nkuyiisya bamu Kkomiti Yamutabig kulanganya mulimo uucitwa aofesi yamutabi, amilimo yakumuuya ya Bakamboni ba Jehova iicitwa mucisi naa zisi nzyoulanganya mutabi wabo.
Bulamfwu bwaciindi cakwiiya: Myezi yobilo.
Bakonzya Kunjila: Baku Maofesi Mapati aa Bakamboni ba Jehova balasala bamu Kkomiti Yamutabi bamwi abamakaintu babo kunjila cikolo, icicitilwa ku Watchtower Educational Center mu Patterson, New York.

Ino lwiiyo ndobapegwa Bakamboni ba Jehova luyeeme aanzi?

Lwiiyo ndobatambula Bakamboni ba Jehova inga lyoonse luyeeme aa Bbaibbele. Tusyoma kuti Bbaibbele lyakasololelwa Leza alimwi akuti lijisi malailile aagwasya kapati mubbazu zyoonse zyabuumi bwa Bunakristo.—2 Timoteyo 3:16, 17.

Sena Bakamboni ba Jehova beelede kubbadela kulwiiyo ndobapegwa?

Peepe. Lwiiyo oolu talubbadelelwi pe. Milimo ya Bakamboni ba Jehova ilagwasyilizigwa akusanga kwakuliyandila.—2 Bakorinto 9:7.

a Bbaibbele alimwi azibelesyo nzyotubelesya kwiiya Bbaibbele, kubikkilizya amavidiyo, nkozili awebbusaiti yesu ya jw.org.

b Mupainiya ngu Kamboni uubbapatizyidwe imusankwa naa musimbi uujisi cikozyanyo cibotu, walo uuyanda kubeleka mawoola aagaminide mwezi amwezi kukambauka mulumbe wamu Bbaibbele kuli bamwi.

c Baalu mbaalumi Banakristo basimide ibayiisya kuzwa mu Magwalo alimwi akweembela bantu ba Jehova kwiinda mukubagwasya akubakulwaizya. Tababbadelwi pe kumulimo ngobacita.

d Mulangizi wabbazu mubelesi waciindi coonse walo uuswaya mbungano ziindene-indene nsondo-ansondo. Ulabakulwaizya bana bookwabo bakumuuya kwiinda mukupa makani aayeeme a Bbaibbele alimwi akubeleka ambabo mumulimo wakukambauka.

e Bakutausi balakutauka milimo iindene-indene kugwasyilizya bakwesu alimwi abacizyi mumbungano. Akaambo kamulimo ngobacita, bapa baalu ciindi cinji cakuyiisya alimwi akucita bweembezi.

f Beteli ndizina lyamaofesi aamitabi aa Bakamboni ba Jehova. Babelesi ibabelekela mumasena aaya bagwasyilizya milimo ya Bakamboni mucilawo camutabi wabo.

g Kkomiti Yamutabi ijisi baaluumi basimide kumuuya botatwe naa kwiinda aawo.

Ino Bakamboni ba Jehova bagwasyigwa buti alwiiyo lwabo?

“Mbwaanga ndilaansoni, cilandikatazya kubandika abantu mbonditazyi kujatikizya Bbaibbele. Pele lwiiyo ndotutambula kumuswaangano wamukati kansondo lwakandigwasya kuba abusicamba bwakubandika abantu mbonditazyi alimwi akuyungizya luzyibo lwangu mukuyiisya. Kunze lyaboobo, ndilacikonzya kubandika kabotu abakwesu abacizyi mumbungano alimwi akumulimo.”—Ba Natasha, baku United States.
“Kunjila Cikolo Cabakambausi ba Bwami kwakandigwasya kuba abube bwabunaleza, mbuli luyando, kukkazika moyo, alimwi aluzyalo. Eeci capa kuti, ndibe Munakristo uuli kabotu, mulongwe alimwi asimukoboma uuli kabotu. Cikolo alimwi cakandigwasya mbondikozya kuvwuntauzya twaambo twamu Bbaibbele alimwi ambondikonzya kupandulula Jwi lya Leza munzila iibasika amoyo bantu.”—Ba Stephen, baku Nigeria.
“Cikolo Cabaalu Bambungano cakandigwasya kuba abube bwakulicesya bwalo mbondiyandika ciindi nondibeleka mbuli mwaalu. Makani akali kukulwaizya mbociyandika kutobela cikozyanyo ca Jesu.”—Ba Luca, baku Italy.
“Cikolo Camulimo wa Bwami cakandiyiisya mbociyandika kuba muntu uusikilika, siluzyalo alimwi uusangalizya ciindi nondibandika abamwi. Ndakaiya kuti ciindi nondicitila bamwi zintu ndeelede kukulwaizyigwa aluyando, ikutali kwiinzya buyo mulawo.”—Ba Samuel, baku United Kingdom.
“Cikolo ca Gileadi cakatugwasya kulilingula mucimbonimboni ca Jwi lya Leza. (Jakobo 1:22-25) Aboobo twakabona kucinca nkotwakeelede kupanga caboola kubube bwesu alimwi amumulimo wesu kuli Jehova. Pele alimwi twakaiya mbociyandika kubikka nzyobayandika bamwi mubusena bwakusaanguna kwiinda nzyotuyanda alimwi akulekela luyando kuti kalutusololela muzintu zyoonse nzyotwaamba akucita.”—Ba Elnathan aba Princess, baku Philippines.