Sena Mulaiya Zyoonse Nzyomukonzya Kuzwa Kuli Jehova?

1. Ino Jehova ulimvwa buti kujatikizya lwiiyo?

¹ Jehova ‘Mwiiyi wesu Mupati’ uyanda kuti twiiye. (Is. 30:20) Wakatalika kuyiisya naakamana kulenga Mwanaakwe mutaanzi kuzyalwa. (Joh. 8:28) Adamu naakazanga, Jehova tanaakaleka kuyiisya, pele caluyando wakazumanana kupa malailile kubantu batalondokede.—Is. 48:17, 18; 2 Ti. 3:14, 15.

2. Ino mbubambe nzi bwalwiiyo buli mukucitwa lino?

² Mazuba aano, Jehova uleendelezya bubambe bwakuyiisya butanacitikide. Mbubwenya mbwaakasinsima Isaya, mamiliyoni aabantu nyika yoonse bakunkila “[ku]cilundu caŋanda ya-Jehova” cacikozyanyo. (Is. 2:2) Nkaambo nzi ncotweelede kuunka kucilundu caŋanda ya Jehova? Kutegwa tukayiisyigwe nzila zya Leza, inzya, kuyiisyigwa a Jehova. (Is. 2:3) Mumwaka wamulimo wa 2010, Bakamboni ba Jehova bakabeleka mawoola aainda ku 1.6 bbiliyoni kukambauka alimwi akuyiisya bantu kasimpe kamu Bbaibbele. Kuyungizya waawo, nsondo ansondo mbungano ziinda ku 105,000 nyika yoonse zilapegwa malailile aakumuuya, alimwi mabbuku aa Bunakristo aapandulula Bbaibbele alamwaigwa amuzike musyomesi uucenjede mumyaambo iinda ku 500.

3. Mbuti nywebo kumugama mbomwagwasyigwa alwiiyo Jehova ndwapa?

³ Amugwasyigwe: Eelo kaka twagwasyigwa kapati alwiiyo luzwa kuli Leza! Twaiya kuti Leza ulaazyina alimwi akuti ulatubikkila maano. (Int. 83:18; 1 Pe. 5:6, 7) Twazyiba bwiinguzi kumibuzyo imwi iiyandika kapati mubuumi mbuli yakuti: Nkaambo nzi bantu ncobapenga akufwa? Mbuti mbondikonzya kujana lukkomano lwini-lwini? Ino buumi bujisi mpindu nzi? Jehova alimwi watupa malailile aajatikizya kulilemeka kutegwa ‘tuzwidilile munzila zyesu.’—Jos. 1:8.

4. Ino mbubambe nzi bwalwiiyo buliko kubabelesi ba Leza, alimwi nkaambo nzi ncotweelede kwiiya zyoonse nzyotukonzya kuzwa kuli Jehova?

⁴ Kuyungizya waawo, Jehova ulapa lwiiyo lwaalubazu kugwasya babelesi bakwe banji kutegwa basumpule mulimo wabo. Kuzwa apeeji 4 kusikila kupeeji 6 kuli mulongo wazikolo zimwi ziliko. Nokuba kuti bukkale bwesu tabuzumizyi kuti tutambule lwiiyo lutondezyedwe, sena tulabikkila maano kulwiiyo luzwa kuli Leza oolo ndotukonzya kutambula kweelana abukkale bwesu? Mbwaanga bakubusi bakulwaizyigwa kubikkila maano kulwiiyo lwaatala lwakunyika abamayi babo alimwi abamwi, sena tulabakulwaizya bakubusi kuba ambaakani zyakumuuya akutambula lwiiyo luzwa kuli Leza lusumpukide kapati? Kwiiya zyoonse nzyotukonzya kuzwa kuli Jehova kuyootugwasya kukkomana mubuumi lino alimwi akuyooba abuumi butamani.—Int. 119:105; Joh. 17:3.

Bubambe Bwalwiiyo Buliko Mumbunga ya Jehova

Cikolo Cakwiiya Kubala Akulemba

• Makanze: Kuyiisya bantu kuzyiba kubala akulemba kutegwa bacikonzye kuba aciiyo cabo beni ca Bbaibbele alimwi akuyiisya bamwi kasimpe.

• Bulamfwu Bwaciindi Cakwiiya: Kweelana aziyandika zyabasikwiiya.

• Busena: Ŋanda ya Bwami yakubusena ooko.

• Mbaani Bakonzya Kunjila: Basikumwaya boonse alimwi abantu batondezya luyandisisyo.

• Mbomukonzya Kulilembya: Baalu mumbungano balabikka bubambe bwacikolo eeci kweelana aziyandika, alimwi balabakulwaizya boonse bayanda kugwasyigwa kutegwa balilembye.

Cikolo Camulimo Weendelezyegwa a Leza

• Makanze: Kuyiisya basikumwaya kutegwa babe bakambausi alimwi abamayi bamakani mabotu bacibwene.

• Bulamfwu Bwaciindi Cakwiiya: Cilazumanana.

• Busena: Ŋanda ya Bwami yakubusena ooko.

• Mbaani Bakonzya Kunjila: Basikumwaya boonse. Alimwi abaabo bajanika lyoonse kumiswaangano yambungano, ibazizumina njiisyo zyamu Bbaibbele alimwi akuti bukkale bwabo kabweendelana anjiisyo zya Bunakristo.

• Mbomukonzya Kulilembya: Amumwaambile mulangizi wa Cikolo Camulimo Weendelezyegwa a Leza.

Cikolo Cakwiiya Mwaambo Wakucisi Cimbi

• Makanze: Kuyiisya basikumwaya kukambauka makani mabotu mumwaambo wakucisi cimbi.

• Bulamfwu Bwaciindi Cakwiiya: Myezi yone naa yosanwe. Kanji-kanji cikolo cilacitwa mu Mujibelo mafwumofwumo kwawoola lyomwe naa obilo.

• Busena: Ŋanda ya Bwami iili afwaafwi.

• Mbaani Bakonzya Kunjila: Basikumwaya bajisi mpuwo mbotu ibayanda kukambauka mumwaambo wakucisi cimbi.

• Mbomukonzya Kulilembya: Cikolo cilabambwa aofesi yamutabi kweelana aziyandika.

Kuyaka Maanda aa Bwami

• Makanze: Kuyaka alimwi akubambulula Maanda aa Bwami. Eeci tacili cikolo pe, pele bubambe oobu bulabagwasya kwiiya milimo iisiyene-siyene iijatikizya mayake aabo balisungula kugwasyilizya mumulimo ooyu.

• Bulamfwu Bwaciindi Cakwiiya: Kweelana abukkale bwasikulisungula.

• Busena: Kulikoonse mucilawo nkokapedwe kabunga Kabasikuyaka Maanda aa Bwami. Basikulisungula bamwi balakonzya kulombwa kuyoogwasyilizya baabo bacitikilwa ntenda mumasena aali kulamfwu.

• Zyeelelo: Bakwesu abacizyi babbapatizyidwe alimwi beelede kuzumizigwa akabunga kabaalu. Balakonzya kuti kabajisi luzyibo mukucita mulimo umwi naa pe.

• Mbomukonzya Kulilembya: Amulembe akutuma foomu ya Kingdom Hall Volunteer Worker Questionnaire njomukonzya kupegwa abaalu bamumbungano yanu.

Cikolo Camulimo Wabupainiya

• Makanze: Kugwasya bapainiya ‘kuzuzikizya mulimo wabo cakumaninina.’—2 Ti. 4:5.

• Bulamfwu Bwaciindi Cakwiiya: Nsondo zyobilo.

• Busena: Bulasalwa aofesi ya mutabi; kanji-kanji Ŋanda ya Bwami iili afwaafwi ilabelesyegwa.

• Zyeelelo: Aabo ibabeleka kabali bapainiya kwamwaka omwe.

• Mbomukonzya Kulilembya: Bapainiya beelela balasalwa kakunyina kulembela alimwi mulangizi wabbazu ulabazyibya kuti basalwa.

Cikolo Cabaabo Ibatalika Mulimo waa Bbeteli

• Makanze: Cikolo eeci cakabambilwa kugwasya baabo bapya a Bbeteli kutegwa bazwidilile mumulimo wabo waa Bbeteli.

• Bulamfwu Bwaciindi Cakwiiya: Woola lyomwe ansondo kwansondo zili 16.

• Busena: Bbeteli.

• Zyeelelo: Beelede kuba bamukwasyi waa Bbeteli baciindi coonse naa aabo ibabeleka kwaciindi cili mbocibede (mwaka omwe naa kwiinda aawo).

• Mbomukonzya Kulilembya: Aabo beelela bamukwasyi wa Bbeteli balasalwa kakunyina kulembela.

Cikolo Camulimo wa Bwami

• Makanze: Kuyiisya baalu alimwi abakutausi kulanganya mulimo wabo wakweendelezya alimwi amikuli yamumbungano. (Mil. 20:28) Eeci cikolo cilacitwa kwainda myaka iili mboibede kweelana akusala kwa Kabunga Keendelezya.

• Bulamfwu Bwaciindi Cakwiiya: Kwamyaka misyoonto yainda, baalu bali kutola buzuba bomwe acisela mpoonya bakutausi buzuba bomwe.

• Busena: Kanji-kanji Ŋanda ya Bwami naa Ŋanda Yakucitila Miswaangano Mipati ilabelesyegwa.

• Zyeelelo: Beelede kuba baalu naa bakutausi.

• Mbomukonzya Kulilembya: Baalu alimwi abakutausi beelela balatambwa amulangizi wabbazu.

Cikolo Cabaalu Bambunganoa

• Makanze: Kugwasya baalu kuti bacikonzye kulanganya mikuli yabo mumbungano.

• Bulamfwu Bwaciindi Cakwiiya: Mazuba osanwe.

• Busena: Bulasalwa aofesi ya mutabi; kanji-kanji Ŋanda ya Bwami naa Ŋanda Yakucitila Miswaangano Mipati ilabelesyegwa.

• Zyeelelo: Beelede kuti kabali baalu.

• Mbomukonzya Kulilembya: Baalu beelela balatambwa aofesi ya mutabi.

Cikolo ca Balangizi Beendeenda Alimwi a Bamakaintu Babob

• Makanze: Kugwasya balangizi bamabazu alimwi abalangizi bazyooko kuzwidilila mumulimo wabo wakuswaya mbungano alimwi akubagwasya “[ku]beleka canguzu mukukanana akuyiisya” akweembela baabo mbobalanganya.—1 Ti. 5:17; 1 Pe. 5:2, 3.

• Bulamfwu Bwaciindi Cakwiiya: Myezi yobilo.

• Busena: Bulasalwa aofesi ya mutabi.

• Zyeelelo: Beelede kuti kabali balangizi bamabazu naa bazyooko.

• Mbomukonzya Kulilembya: Balangizi beendeenda antoomwe abamakaintu babo balatambwa aofesi ya mutabi.

Cikolo Cakwiiya Bbaibbele ca Bakwesu Batakwetec

• Makanze: Kugwasya baalu alimwi abakutausi batakwete kutegwa batambule mikuli iiyungizyidwe. Bunji bwabaabo bakamanizya cikolo eeci balatumwa kuyoobelekela kumasena aabulide basikumwaya ba Bwami mucisi cabo. Bamwi balakonzya kutumwa kuyoobelekela kucisi cimbi ikuti bazyibya ofesi ya mutabi kuti balilibambilide kucita oobo.

• Bulamfwu Bwaciindi Cakwiiya: Myezi yobilo.

• Busena: Bulasalwa aofesi ya mutabi; kanji-kanji Ŋanda Yakucitila Miswaangano Mipati naa Ŋanda ya Bwami ilabelesyegwa.

• Zyeelelo: Bakwesu batakwete bajisi myaka iili akati ka 23 a 62 yakuzyalwa bataciswi-ciswi ibayanda kutola ambele zyintu zya Bwami kufwumbwa nkobakonzya kuyandika. (Mk. 10:29, 30) Beelede kuti kabali baalu naa bakutausi kwamyaka yobilo iitobelene.

• Mbomukonzya Kulilembya: Ikuti cikolo eeci kaciliko mucilawo canu cilanganizyigwa amutabi, muswaangano wabaabo ibayanda kulilembya uyoocitwa kumuswaangano wabbazu. Makani manji alabandikwa ciindi camuswaangano ooyu.

Cikolo Cakwiiya Bbaibbele ca Banabukwetene Banakristod

• Makanze: Kupa banabukwetene lwiiyo lwaalubazu kutegwa kababelesyegwa kapati mumbunga ya Jehova. Bunji bwabaabo banoomanizya cikolo eeci banootumwa kuyoobelekela kumasena aabulide basikumwaya ba Bwami mucisi cabo. Bamwi balakonzya kutumwa kuyoobelekela kucisi cimbi ikuti kabalibambilide kucita oobo.

• Bulamfwu Bwaciindi Cakwiiya: Myezi yobilo.

• Busena: Makkilasi aakusaanguna masyoonto acitilwa ku Watchtower Educational Center ku Patterson mudolopo lya New York mucisi ca U.S.A. Mukuya kwaciindi, zikolo eezyi zinoocitilwa mumasena aayoosalwa aofesi yamutabi, kanji-kanji Ŋanda Yakucitila Miswaangano Mipati naa Ŋanda ya Bwami inoobelesyegwa.

• Zyeelelo: Banabukwetene balaamyaka yakuzyalwa iili akati ka 25 a 50 alimwi bataciswi-ciswi bacikonzya kubelekela kubusena kubulide alimwi bajisi muuya wa: “Mpendi! Unditume mebo!” (Is. 6:8) Kuyungizya waawo, beelede kuti kabakwetene kwamyaka yobilo alimwi kabali mumulimo waciindi coonse kwamyaka yobilo iitobelene.

• Mbomukonzya Kulilembya: Ikuti cikolo eeci kaciliko mucilawo canu cilanganizyigwa amutabi, muswaangano wabaabo ibayanda kulilembya uyoocitwa kumuswaangano waalubazu. Makani manji alabandikwa ciindi camuswaangano ooyu.

Cikolo ca Gilead

• Makanze: Kuyiisya bapainiya alimwi abamwi bali mumulimo waciindi coonse mulimo wabumisyinali.

• Bulamfwu Bwaciindi Cakwiiya: Myezi yosanwe.

• Busena: Ku Watchtower Educational Center ku Patterson mudolopo lya New York mucisi ca U.S.A.

• Zyeelelo: Banabukwetene babbapatizyidwe kwamyaka yotatwe alimwi bajisi myaka yakuzyalwa iili aakati ka 21 a 38 nobalembela kucikolo eeci ciindi cakusaanguna. Beelede kuti kabacizyi kwaambaula Cingisi, kabakwetene kwamyaka yobilo, alimwi kabali mumulimo waciindi coonse kwamyaka yobilo iitobelene. Alimwi beelede kuti kabataciswi-ciswi. Bapainiya babelekela kucisi cimbi (kubikilizya abaabo bajisi zyeelelo zyabumisyinali); balangizi beendeenda; bamukwasyi wa Bbeteli; alimwi abaabo bakamanizya Cikolo Cakwiiya Mulimo, Cikolo Cakwiiya Bbaibbele ca Bakwesu Batakwete, alimwi a Cikolo Cakwiiya Bbaibbele ca Banabukwetene Banakristo abalo balakonzya kulembela kuti kabasika azyeelelo.

• Mbomukonzya Kulilembya: Mumitabi iisalidwe, muswaangano wabaabo bayanda kunjila cikolo eeci ulacitwa amuswaangano wacooko. Makani manji alabandikwa ciindi camuswaangano ooyu. Kuti mucisi canu muswaangano uuli boobu taucitwi amiswaangano yacooko alimwi muyanda kulembela, mulakonzya kulembela kuofesi yamutabi kutegwa mumvwe makani manji.

Cikolo ca Bamukkomiti ya Mutabi Alimwi a Bamakaintu Babo

• Makanze: Kugwasya baabo bali Mumakkomiti aa Mitabi kutegwa bacikonzye kwiicita kabotu milimo yabo yakulanganya Bbeteli, kulanganya makani aajatikizya mbungano, kulanganya mabazu azyooko mucilawo cacisi, mulimo wakusandulula, kusimba, kutola mabbuku kumbungano alimwi akulanganya milimo iisiyene-siyene.—Lk.12:48b.

• Bulamfwu Bwaciindi Cakwiiya: Myezi yobilo.

• Busena: Ku Watchtower Educational Center ku Patterson mudolopo lya New York mucisi ca U.S.A.

• Zyeelelo: Bamukkomiti ya Mutabi naa Kkomiti Yamucisi naa aabo bayoopegwa mulimo ooyu baakumanizya cikolo.

• Mbomukonzya Kulilembya: Bakwesu abamakaintu babo beelela balatambwa a Kabunga Keendelezya.

[Bupanduluzi buyungizidwe]