Tweelede Kubulemeka Bweendelezi bwa Jehova
Ino ncinzi ciboola mumizeezo yenu nomumvwa mazina aansiku aakuti Kora, Datani alimwi a Abiramu? Mbuzangi! Kuzangila nzi? Ibweendelezi mbwabikkide Leza. Zyakacitika akaambo kabuzangi bwabo zililembedwe ku Myeelwe caandaano 16 alimwi makani aaya alajanika mucibalo cakuti “Amulibombye Akusyomeka Kubweendelezi bwa Leza” mu Ngazi Yamulindizi ya August 1, 2002. Mulakonzya kugwasyigwa kwiinda mukwaabala makani aaya, mpoonya akulanga-langa mbozitondezyedwe munzila iipa kuyeeyesya muvidiyo yakuti Respect Jehovah’s Authority (Amubulemeke Bweendelezi bwa Jehova). Mulabona mazwanga akaliko akati kabana ba Kora basyomeka alimwi abausyi bazangi bakali kukazyanya a Mwami wabubumbo. (My. 26:9-11) Eeci cisobano cakacitika ncobeni ceelede kutukulwaizya toonse kuba bantu basyomeka cakumaninina kuli Jehova.
Nomulangilila vidiyo eeyi, amulange bumboni Kora alimwi abeenzinyina bazangi mobakaalilwa kusyomeka mumbazu ziyandika kapati zili cisambomwi: (1) Ino mbuti mbobatakabulemeka bweendelezi mbwaakabikkide Leza? (2) Ino mbuti mbobakalekela kulisumpula, kulombozya zyuuno zisumpukide alimwi amunyono kubeendelezya? (3) Ino mbuti mbobakabikkila maano kukutalondoka kwabaabo mbaakabikkide Jehova? (4) Ino mmuuya wakutongooka uuli buti ngobakaba anguwo? (5) Nkaambo nzi ncobakaleka kwiikkomanina milimo njobakapedwe? (6) Ino mbuti mbobakatondezya kusyomeka kubeenzinyina abanamukwasyi muciindi cakusyomeka kuli Leza?
Amubone mbuli ziiyo zili mucisobano camu Bbaibbele eeci mboziswaangene ambotububona bweendelezi mbwabikkide Leza mazubaano: (1) Ino tweelede kukubona buti kusala nkobacita baalu mumbungano, alimwi ino nkaambo nzi? (2) Mbuti mbotunga twamanizya makanze mabyaabi aali woonse ngotujisi mumoyo? (3) Ino tweelede kucita buti kujatikizya kutalondoka kwabaabo babikkidwe kutusololela? (4) Ino ncinzi ncotweelede kucita ikuti twatalika kuba amuuya wakutongooka? (5) Ino tweelede kulimvwa buti kujatikizya milimo iili yoonse njotupedwe? (6) Nkuuli bani nkotuteelede kusyomeka kwiinda mbotusyomeka kuli Leza, alimwi ino ndiilili eeci nocikonzya kuba musunko uukatazya kulindiswe?
Makani aaya aakumana kubandikwa mumbungano, amukailangilile alimwi vidiyo. Ikwiilangilila lwabili akukamupe twaambo tumbi ncotweelede kubulemeka lyoonse bweendelezi bwa Jehova!—Int. 18:25; 37:28.