Ziyeezyo zya Ciibalusyo

Ciibalusyo camwaka uuno ciyoocitwa muli Bwane, March 24. Baalu beelede kubikkila maano kutwaambo ootu tutobela:

◼ Nomusala ciindi cakuswaangana, amukasinizye kuti zikozyanyo tazyiinzyigwi pe kusikila izuba lyaakubbila.

◼ Boonse kubikkilizya amwaambi, beelede kuzyibisyigwa ciindi cini-cini cakuswaangana alimwi abusena nkociyoocitilwa Ciibalusyo.

◼ Mweelede kujana cinkwa alimwi awaini weelede akubona kuti zintu eezyi zyabambilwa limwi.—Amubone Ngazi Yamulindizi ya March 1, 2003, mapeeji 10-11.

◼ Mbale, matambula, tafwule lyeelede alimwi akasani kaatafwule zyeelede kuletwa kubusena bucitilwa Ciibalusyo akuzyibikka kabotu kakucili ciindi.

◼ Ŋanda ya Bwami naa busena buli boonse nkomuyooswaanganina bweelede kusalazyigwa kabotu-kabotu kakucili ciindi.

◼ Mweelede kusalila limwi bagwasyilizyi abasikwiinzya zikozyanyo zyamulalilo akubalailila kabotu ncobeelede kucita kakucili ciindi alimwi ambociyandika kusama zisani zipa bulemu akulibamba bweelede.

◼ Kweelede kucitwa bubambe bwakutolela zikozyanyo zyamulalilo bananike aabo batakonzyi kusika akaambo kakuciswa.

◼ Ciindi nokuli mbungano zinji zibelesya Ŋanda ya Bwami yomwe, mweelede kumvwana kabotu ambungano eezyo kutegwa kutabi kwaatikizyanya kwabantu amulyango, mutuzila alimwi aabusena busiigwa myootokala.