Ziyeezyo zya Ciibalusyo

Ciibalusyo camwaka uuno ciyooba muli Bwane mu March 28. Baalu beelede kubikkila maano kutwaambo ootu tutobela:

◼ Nomusala ciindi camuswaangano, amukasinizye kuti zikozyanyo tazyiinzyigwi pe kusikila mane zuba lyabbila mbyo.

◼ Boonse kubikkilizya amwaambi, beelede kuzibisyigwa ciindi cini-cini alimwi abusena nkociyoocitilwa Ciibalusyo eeci.

◼ Mweelede kujana musyobo wacinkwa alimwi awaini weelede akubona kuti zintu eezyi zyabambilwa limwi.—Amubone Ngazi Yamulindizi yamu Cingisi ya February 15, 1985 apeeji 19.

◼ Mbale, matambula, tafwule lyeelede alimwi akasani kaatafwule zyeelede kuletwa kubusena oobo akuzibikka kabotu kakucili ciindi.

◼ Ŋanda ya Bwami naa busena buli boonse nkomuyooswaanganina bweelede kusalazyigwa kabotu-kabotu kakucili ciindi.

◼ Mweelede kusalila limwi bagwasyilizi abasikwiinzya zikozyanyo zyamulalilo akubalailila kabotu ncobeelede kucita kakucili ciindi alimwi beelede kusama zisani zipa bulemu akulibamba bweelede.

◼ Kweelede kucitwa bubambe bwakubatolela zikozyanyo zyamulalilo ooyu bananike aabo batakonzyi kusika akaambo kakuciswa.

◼ Ciindi nokuli mbungano zinji zibelesya Ŋanda ya Bwami yomwe, mweelede kumvwana kabotu akati kambungano kutegwa kutabi kwaatikizyanya kwabantu amulyango, mutuzila twiinda bantu alimwi aabusena busiigwa myootokala.