Ziyeezyo zya Ciibalusyo

Ciibalusyo camwaka uuno ciyoocitwa mu Muhulo, April 2. Baalu beelede kubikkila maanu kutwaambo ootu tutobela:

◼ Nomusala ciindi cakuyooswaangana, amukabone kuti zikozyanyo tiizyainzigwa pe kusikila izuba lyaakubbila.

◼ Boonse kubikkilizya amwaambi, beelede kuzibisyigwa ciindi cini-cini cakuswaangana alimwi abusena nkociyoocitilwa Ciibalusyo.

◼ Mweelede kujana cinkwa alimwi awaini weelede, akubona kuti zintu eezi zyabambilwa limwi.—Amubone Ngazi Yamulindizi ya March 1, 2003, mapeeji 10-11.

◼ Mbale, matambula, tafwule lyeelede alimwi akasani kaatafwule zyeelede kuletwa kubusena bucitilwa Ciibalusyo akuzibikka kabotu kakucili ciindi.

◼ Ŋanda ya Bwami naa busena buli boonse nkomuyooswaanganina bweelede kusalazigwa kabotu-kabotu kakucili ciindi.

◼ Mweelede kusalila limwi basikugwasyilizya abasikwiinzya zikozyanyo zyamulalilo akubalailila kabotu ncobeelede kucita kakucili ciindi alimwi ambobayandika kusama zisani zipa bulemu akulibamba bweelede.

◼ Ibubambe bweelede kucitwa bwakubatolela zikozyanyo zyamulalilo bananike aabo batakonzyi kusika akaambo kakuciswa.

◼ Ikuti kakuli mbungano zinji zibelesya Ŋanda ya Bwami yomwe, mweelede kumvwana kabotu ambungano eezyo kutegwa kutakabi kwaatikizyanya kwabantu amulyango, mutuzila alimwi aabusena busiigwa myootokala.