Mulongo Wazyakucita Zyamukwasyi—Mulimo Wamumuunda Wamukwasyi
1 Jehova ulakkomana kubona bana baniini kabatembaula zina lyakwe. (Int. 148:12, 13) Kuciindi Jesu naakali anyika ‘twana tuniini alimwi atunyonka twakatembaula’ Leza. (Mt. 21:15, 16) Eeci cilacitika amazuba aano. Nobazyali, mbuti mbomunga mwagwasya bana banu kutegwa babe basungu mukutembaula Jehova mumulimo wa Banakristo? Mbuli mbokukankaizyidwe mucibalo cili atala kujatikizya miswaangano yambungano, iciyandika ncikozyanyo canu. Wisi bana umwi wakaamba boobu kutondezya mbobalimvwa bazyali banji: “Cikozyanyo cabazyali ncecintu ciyandika kwiinda majwi ngobaamba.”
2 Mucizyi umwi wakalelwa abazyali bayoowa Leza wakaamba kuti: “Taakwe notwakali kubuka mafwumofwumo mu Mujibelo katutazyi naa tulaunka mumulimo wakukambauka. Twakalizi kuti tulaunka.” Ncimwi buyo, mulakonzya kuyiisya bana banu mbouyandika mulimo wakukambauka kwiinda mukuba abubambe bwa lyoonse amvwiki bwakutola lubazu mumulimo wakukambauka amukwasyi. Eeci ciyoopa kuti bana banu bayiye ndinywe alimwi ciyoopa kuti mucikonzye kubona mbobayeeya, mbobalilemeka alimwi ambobayaambele muluzyibo.
3 Lwiiyo Luyaambele: Kutegwa bana baukkomanine mulimo, bayandika kulibambila kutegwa kabatola lubazu cakuzwiidilila. Mucizyi waambwa atala alimwi wakaamba kuti: “Teetwakali kwiide kusindikila buyo bazyali mumulimo wabo. Twakalizyi kuti andiswe tulatola lubazu, nokuba kulizya buyo mulangu amulyango alimwi akusiya cakubala. Kwiinda mukulibambila kabotu katutana unka mubukambausi kumamanino amvwiki aimwi twakalizyi ncotunga twaamba.” Mulakonzya kuyiisya bana banu kwiinda mukubelesya maminiti ali mbwaabede amvwiki kutegwa balibambile mulimo ambweni nomucita ciiyo camukwasyi naa ciindi cimbi.
4 Kukambauka antoomwe amukwasyi kulakonzya kumupa coolwe acimbi cakuyiisya bana banu kasimpe. Wisi bana umwi Munakristo wakali kutoleezya mwanaakwe musimbi mulweendo lwa makkilomita aali 10 kuya kukumwaya matulakiti kumunzi wamucibanda ngobakalibambene. Mucizyi ooyu ulayeeya ategwa: “Muukuyaabweenda nkweena ooku bataata mubakandiyiisya kasimpe.” (Dt. 6:7) Amujane cilongezyo kwiinda mukubikkilizya mulimo wamumuunda mumulongo wazyakucita zyamukwasyi wanu amvwiki.