Amugwasye Bana Banu Kuyaambele mu Mulimo
1 Bazyali Banakristo balijisi mukuli mupati wakuyiisya bana babo kuti kabatola lubazu mumulimo kuzwa kubwana. Balakonzya kucita oobu munzila zinji. Bana bamwi balakonzya kwaamba majwi alugwalo lumwi lweelela lwamu Bbaibbele noliba leelyo nibatanacizyiba kubala. Eeci cilakonzya kubajatikizya kapati baswiilizi. Ciindi ibana nobayaabukomena, balakonzya kucita zinji mumulimo. Mbuti nobazyali mbomukonzya kugwasya bana banu kutegwa batole lubazu mukupa bumboni? Ambweni nzila eezyi inga zyagwasya.
2 Mwamanizya kwaanzyanya, inga mwaamba kuti:
◼ “Kuli lugwalo lujisi kaambo kabotu, mwanaangu ooyu, [zina lyakwe] ndwayanda kuti amwaambile.” Mwanaanu inga waamba kuti: “Ilugwalo oolu luli ku Intembauzyo lwakandiisya kuzyiba zina lya Leza. [Mwana abale naa kwaamba majwi ali ku Intembauzyo 83:18.] Imamagazini aaya alaamba kujatikizya ncayootucitila Jehova Leza. Sena inga ndamusiila?” Mulakonzya kumanizya mubandi kwiinda mukupandulula mbougwasyigwa mulimo wanyika yoonse.
3 Antela mulakonzya kusoleka nzila eeyi:
◼ “Mwapona buti? Ndiyiisya mwanaangu ooyu musimbi, [zina lyakwe], kutegwa kababikkila maano bantu bamucilawo cesu. Uyanda kuti amwaambile mulumbe wamu Bbaibbele mubufwaafwi.” Ulakonzya kwaamba kuti: “Nzila imwi mbondiyanda kugwasya bantu nkwiinda mukubaambila bulangizi bwamu Bbaibbele bwakumbele. [Mwana abale naa kwaamba majwi ali ku Ciyubunuzyo 21:4.] Mamagazini aaya alaamba Bwami bwa Leza ncobuyootucitila. Ndijisi lusyomo lwakuti muyookkomana kwaabala.”
4 Ikuzumanana kubelesya nzila nguba-uba kulakonzya kupa kuti bana babe basicamba nobaambila bamwi mulumbe wa Bwami. Ikwiinduluka-induluka ikugaminide kubayiisya kwaamba kabotu alimwi ajwi lilimvwisya kulakonzya kupa kuti bacikonzye kukanana nobali mubukkale busiyene-siyene. Ikulibambila kabotu kakucili ciindi alimwi akubalumbaizya camoyo woonse kuyoobagwasya bana ikwaamba nzyobasyoma.
5 Kwiinda mukukulwaizyigwa munzila eeyi, ibana banji beelela kuba basikumwaya batabbapatizyidwe. Elo kaka cilakkomanisya ikubona bana besu kabayaambele mumulimo wa Bunakristo!—Int. 148:12, 13.