Bubambe Bupya bwa Muswaangano Wabbazu

Mumazuba ano aamamanino aanyika eeyi iisofweede, cilayandika kuti tubambe zisani zyesu zyakumuuya akukwabilila Bunakristo bwesu. (Ciy. 16:15) Aboobo, cileelela kuti mutwe wa muswaangano wabbazu wamwaka wamulimo wa 2006 ukabe wakuti ‘Amulisamike Buntu Bupya.’—Kol. 3:10.

Buzuba Bwakusaanguna: Makani aakusiilana akusaanguna aakuti “Kutondezya Bube bwa Buntu Bupya,” ayootondezya ikuba abuntu bupya mbokutugwasya mubukkale bwesu boonse. Mbuti mbotukonzya kuba abuntu bupya? Mubuzyo ooyu uyooingulwa mumakani obile aamamanino mubuzuba bwakusaanguna aakuti, “Amube Bankutwe Kutegwa Muzinzibale Kuyeeya Kabotu” aakuti “Lwiiyo Lutupa Kusama Buntu Bupya.”

Buzuba Bwabili: Ibuntu bupya mbobutukulwaizya kubelesya lulimi, nkakaambo kayoolangwa-langwa mumakani aabili aakusiilana aakuti, “Kuba Alulimi lwa Basongo.” “Sena Muli Mukumuzunda Imubi?” ngomutwe wamakani aabuleya, ayookankaizya mbociyandika kuzumanana katupakamene kuziba nzila zya Saatani. Makani obilo aamamanino aamuswaangano aakuti, “Mutabi Akabala Nikaba Komwe Kaansi” aakuti “Kubukulusya Buntu Bwesu Bwamukati Buzuba Abuzuba,” ayootugwasya kuleka ziyanza akulilemeka kuteendelani anzila zya Leza ziluleme akuzumanana kwiima nji mukukomba Jehova.

Elo kaka tulakulangila ikukulwaizyigwa ooku kwakusama buntu bupya akububamba!