Lwiiyo Lusololela Kubuumi
1 Eelo kaka cilakkomanisya kubona bantu mbobayabumvwisya kasimpe kazwa mu Jwi lya Leza! Kwaambila bamwi luzibo lwa Leza amakanze ngajisi kubantu cintu cikkomanisya ncobeni. Lwiiyo oolu lulakonzya kusololela muntu kubuumi butamani.—Joh. 17:3.
2 Ikaambo Lwiiyo Oolu Ncoluli Lubotu Kwiinda: Lwiiyo mazubaano lulapegwa munzila zinji zikonzyeka amukaambo koonse kakonzya kuyeeyelwa. (Muk. 12:12) Pele luzibo oolu talugwasyi lweelanisyigwa ku “milimo mipati ya-Leza.” (Inc. 2:11) Sena lwiiyo lupegwa abantu bamunyika lwakonzya kupa bantu kuti babe acilongwe a Mulengi akuzyiba makanze aakwe? Sena lwagwasya bantu kucimvwisya cicitika twafwa naa ikaambo ncokuli mapenzi manji boobu? Sena lwapa bulangizi kubantu? Sena lwagwasya kutola ambele bubambe bwa mukwasyi? Peepe. Nkwiinda mulwiiyo lulikke luzwa kuli Leza notukonzya kujana bwiinguzi bwini-bwini kumibuzyo iiyandika kapati iijatikizya buumi.
3 Lwiiyo luzwa kuli Leza lulapa cintu ncobabulide bantu bamunyika mazubaano—nkokuti kulilemeka kwabantu mbotwiiya limwi. Ijwi lya Leza lipa kuti kulangana mubala, musyobo, akuyandisya cisi kumanine limwi mumyoyo yabaabo bazumina akutobela nzyoliyiisya. (Heb. 4:12) Lyapa bantu kuleka nkondo zili zyoonse akuti ‘balisamike buntu bupya.’ (Kol. 3:9-11; Mik. 4:1-3) Kuyungizya waawo, lwiiyo luzwa kuli Leza lwapa tuulunzuma twabantu nguzu zyakuzunda tumpenda abube ibutamukkomanisyi Leza.—1 Kor. 6:9-11.
4 Ikaambo Ncoluyandika Kapati Lino: Mwiiyi wesu Mupati ulatwiibalusya ncocipandulula ciindi ncotupona. Mbeta zyakwe zyabusinsimi zijisi mulumbe wamazubaano weelede kwaambilizyigwa nyika yoonse. (Ciy. 14:6, 7) Kristo uleendelezya kujulu, bweendelezi bwanyika yoonse bwa bukombi bwakubeja ino-ino buyoonyonyoonwa alimwi Bwami bwa Leza bulilibambilide kunyonyoona mfwulumende zyoonse zyanyika. (Dan. 2:44; Ciy. 11:15; 17:16) Aboobo, cilayandika kapati kuti bantu bamuzyibe Mwami weendelezya lino uusalidwe a Leza, bazwe muli Babuloni Mupati alimwi akwiita muzina lya Jehova calusyomo. (Int. 2:11, 12; Rom. 10:13; Ciy. 18:4) Atutole lubazu mbuli mbotukonzya mukuyiisya bamwi lwiiyo lusololela kubuumi.