Nobakubusi—Ino Ncinzi Ncomuyoocita Mubuumi Bwanu?
1 “Ndiyanda kuzwidilila mubuumi bwangu.” Mbwaakaamba oobo musimbi umwi uujisi myaka yakuzyalwa iili akati ka 13 a 19. Cakutadooneka, anywebo mulayanda kuzwidilila. Pele ino mbuti mbomukonzya “kuzwidilila” mubuumi bwanu? Makani aamwaigwa muli sikapepele, miteende, mamagazini alimwi azyaambwa abamisela yanu naa bamayi banu, zilakonzya kazyaamba kuti kuzwidilila kulajanwa kwiinda mukuvwola mali manji alimwi akuba amulimo umwi waatala kapati—kuba muntu uutegwa ukkede kabotu!
2 Pele Bbaibbele licenjezya bakubusi kuti, ikuyandisya buvwubi bwakumubili “cili mbuli kutandaanya luuwo.” (Mukambausi 4:4, BT) Cimwi cipa kuti kube boobo ncakuti, mbasyoonto bakubusi ibavwuba ncobeni akuba aampuwo. Aabo ibavwuba akuba ampuwo kanji-kanji balatyompwa kapati. Mukubusi umwi waku Britain iwakasoleka canguzu kwiiya mulimo waatala kapati waamba kuti: “Ikuzwidilila munzila yakumubili kuli mbuli cibbokesi cinyina cintu mukati. Kunyina mpindu iijanwa pe.” Masimpe, imulimo zimwi ziindi ulakonzya kupa buvwubi alimwi ampuwo. Pele kunyina nounga wazuzikizya ‘nzyomuyandika munzila yakumuuya.’ (Mt. 5:3) Kunze lyaboobo, lugwalo lwa 1 Johane 2:17 lucenjezya kuti “nyika ilamana.” Nokuba kuti mwazwidilila munyika eeyi, ikuzwidilila kwanu kunooli buyo kwakaindi kasyoonto.
3 Ikweelela Kuba Kamboni wa Jehova: Cakusaanguna, mweelede kuba aluyandisisyo lwakubelekela Leza—pele nokuba kuti bazyali banu Mbanakristo, iluyandisisyo oolo talujanwi buyo kakunyina kulubelekela pe. Mweelede kuba acilongwe nywebo lwenu a Jehova. Mukubusi musimbi umwi uujisi myaka yakuzyalwa iili akati ka 13 a 19 waamba kuti, “Ikupaila kulamugwasya mukuba acilongwe canu nobeni a Jehova.”—Int. 62:8; Jak. 4:8.
4 Bbuku lya Ba-Roma 12:2 litondezya ntaamu iimbi njomweelede kubweza. Lyaamba kuti: “[Amulilingule kujatikizya] makani ngaayanda Leza, makani mabotu aatambulika aalondokede.” Sena kuli ciindi nomwakazidoonekede zintu zimwi nzyomwakayiisigwa? Ikuti naa mboobo, amutobele lulayo lwamu Bbaibbele, alimwi ‘amulilingule’ kutegwa musinizye kuti zintu eezi nzyakasimpe! Amulivwuntauzizye nobeni. Amulibale Bbaibbele alimwi amabbuku aapandulula Bbaibbele. Pele ikwiiya makani aajatikizya Leza takuli kwiile kubelesya buyo maanu pe. Amujane ciindi cakuzinzibala kuyeeya zintu nzyomubala ikutegwa mutazilubi. Eeci ciyoopa kuti luyando ndomujisi kuli Leza lukomene.—Int. 1:2, 3.
5 Mpoonya amusole kwaambila bamwi, mbuli basicikolonyoko zintu nzyomwiiya kwiinda mukwiizya ambabo. Intaamu iitobela njakutalika kukambauka kuŋanda aŋanda. Muziindi munooswaangana abamwi mbomwiiya limwi kucikolo mwanookambauka, alimwi eeci kumatalikilo cilakonzya kumuyoosya. Pele Bbaibbele litukulwaizya kuti tatweelede ‘kuusa insoni ku Makani Mabotu.’ (Rom. 1:16) Muli mukumwaya makani aapa buumi abulangizi! Ino nkaambo nzi ncomweelede kuba ansoni akaambo kangawo?
6 Ikuti bazyali banu kabali Banakristo lino, ambweni mwakatalika kale kuunka ambabo mumulimo ooyu wakukambauka. Pele sena mulakonzya kucita zimbi kunze buyo lyakwiimikila amulyango kamuumwine naa kwiile kwaabila bantu mamagazini alimwi amatulakiti? Sena mulakonzya nywebo lwenu kwaambaula kumuntu kamubelesya Bbaibbele ikumuyiisya ooyo uuli aŋanda? Ikuti kamutakonzyi, abamugwasye bazyali banu naa umwi uusimide mumbungano. Amukanze kweelela kuba basikumwaya bamakani mabotu batabbapatizidwe!
7 Aciindi cakubbapatizigwa, muba umwi wa Bakamboni ba Jehova. (Is. 43:10) Eeci ceelede kumunjila mumoyo kapati ikujatikizya ncomuyoocita mubuumi bwanu kuzwa ciindi eeco. Kulyaaba kubikkilizya ‘kuliimya.’ (Mt. 16:24) Mulakonzya kuliimya zintu zimwi nzyomwakali kuyanda kucita kutegwa ‘musaangune kuyandaula Bwami bwa-Leza.’ (Mt. 6:33) Aboobo ikulyaaba alimwi akubbapatizigwa kumupa zyoolwe zinji zyakucita boobo. Atulange-lange zimwi zyanzizyo.
8 Zyoolwe Zyakubelekela Leza Ciindi Coonse: Mulimo wabupainiya ncimwi cazyoolwe akati kazeezi. Sikumwaya imupainiya Mmunakristo uubbapatizidwe uupa cikozyanyo cibotu walo wakalibambila kunoobeleka mawoola aataleli ku 70 mwezi amwezi kakambauka makani mabotu. Kutola ciindi cinji mumulimo wamumuunda kuyoomugwasya kusumpula luzibo lwanu lwakukambauka akuyiisya bamwi. Bapainiya banji babona lukkomano luboola akaambo kakugwasya mbobaiya limwi Bbaibbele ikuba Bakamboni babbapatizidwe. Ino mmulimo nzi wakumubili uujisi mpindu alimwi uukondelezya mbuli ooyu?
9 Cikolo Cakwiiya Mulimo cakatalisigwa kutegwa ibaalu abakutausi batakwete bayiisigwe mulimo. Lwiiyo lutola nsondo zili lusele lulabikkilizya amakani aajatikizya mikuli yabaalu abakutausi, mboibeleka mbunga alimwi akubandika kubuleya. Bamwi balatumwa kuyoobelekela muzisi mobazwa. Ibamwi batumwa kuyoobelekela mumasi aakule.
10 Mulimo waku Bbeteli ubikkilizya kubeleka kamuli basikulisungula kuofesi yamutabi imwi ya Bakamboni ba Jehova. Ibamukwasyi wa Bbeteli bamwi babeleka mulimo wakumwaya mabbuku aapandulula zyamu Bbaibbele. Ibamwi babeleka mulimo uugwasilizya kucita boobo, mbuli wakubambulula mayake alimwi akulanganya zibelesyo naa zintu zyakumubili nzyobayandika bamumukwasyi wa Bbeteli. Milimo iicitwa yoonse mmilimo iisetekene iibelekelwa Jehova. Kuyungizya waawo, aabo ibabelekela ku Bbeteli balikkomene kuziba kuti mulimo ngobabeleka ugwasya babunyina banji kapati munyika yoonse.
11 Amubelekele Jehova Amoyo Woonse: Ikubelekela Jehova nenzila mbotu kwiinda zyoonse yakubelesya buumi bwanu. Amulibikkile mbaakani yakubelekela Leza ciindi coonse. Amwaabandike makani aaya aajatikizya mulimo waciindi coonse abazyali banu, baalu bamumbungano yanu alimwi amulangizi wanu wabbazu. Ikuti kamuyanda kuya ku Bbeteli, naa ku Cikolo Cakwiiya Mulimo, kamujanika lyoonse kumiswaangano yabaabo bayanda kulembela yalo iicitwa lyamiswaangano yabbazu alimwi ayacooko.
12 Mmasimpe, tabali boonse banga beelela naa ibakonzya kubeleka mulimo waciindi coonse. Zimwi ziindi mapenzi aakuciswa-ciswa, aamali alimwi amikuli yamikwasyi alakonzya kusinkila zeezyo nzyakonzya kucita muntu. Nokuba boobo, Banakristo boonse balyaabide beelede kuutobela mulawo wamu Bbaibbele wakuti: “Yanda Leza Jehova wako amoyo wako woonse, amoya wako woonse, amumiyeeyo yako yoonse.” (Mt. 22:37) Jehova uyanda kuti musolekesye kucita kusikila mpomugolela kweelana abukkale bwanu. Aboobo, kunyina makani abukkale bwanu, kubelekela Jehova ayibe mbaakani yanu lyoonse mubuumi bwanu. Amulibikkile mbaakani nzyomukonzya kuzuzikizya mumulimo ngomubelekela Leza. Masimpe, ‘kamuyeeya Mulengi wanu mumazuba aabukubusi bwanu’—eelyo akaambo kakucita boobo muyoolongezyegwa kukabe kutamani!