Ipulogilamu Mpya ya Muswaangano Waalubazu

Ikuti naa twabona antela kumvwa citondezyo cakucenjezya kumane kunyina ncotucita, icinga catobela nintenda. Iciyandika kapati nkutobela mmalailile aakumuuya Jehova ngatupa. Eeci ciya kukankaizyigwa mupulogilamu yamuswaangano waalubazu yamumwaka wamulimo ngotulangila. Mutwe wamakani ngwakuti, “Amucenjele Mbomumvwa.”—Lk. 8:18.

Mumakani aakwe aakusaanguna, mwaambi uuswaya uya kulanga-langa mbolutugwasya sunu lulayo lujanika muzyaandaano zyamatalikilo zyalugwalo lwa Paulo lwakasololelwa amuuya ndwaakalembela bana Hebrayo. Mumakani aamamanino aajisi mutwe wakuti, “Kamubikkila Maanu Lyoonse Kumalailile aa Leza,” uya kubagwasya boonse kulilingula naa balamuswiilila ncobeni Jehova, mwanaakwe alimwi a “muzike musyomesi uucenjede.”—Mt. 24:45.

Makani aali mbwaabede mupulogilamu ayoogwasya ikapati kumikwasyi. Imakani aajisi mutwe wakuti, “Imikwasyi Iiswiilila Jwi lya Leza Kakunyina Kunyonganizyigwa,” aya kutugwasya kutalekela zintu zyamunyika kutunyonganya kumuuya. Aya kubikkilizya akubuzya-buzya baabo bakacinca buumi bwabo kutegwa babikke zintu zyakumuuya mubusena bwakusaanguna. Makani ajisi mutwe wakuti, “Ikuswiililisya Jwi lya Leza Mbokubayumya Bakubusi Besu” ayoobikkilizya kubuzya-buzya bakubusi ibazumanana mukasimpe kucikolo, nobali abeenzinyina naa mumulimo wamumuunda. Makani aakuti, “Ibana Bamuswiilila Leza Alimwi Akwiiya,” aya kutugwasya kutaubya-ubya nzyobakonzya kwiiya bana basyoonto. Kubuzya-buzya bana abazyali babo kuya kutugwasya kubona mpindu zijanwa notuyiisya bana nzila zya Jehova kuzwa kubuvwanda.

Nokuba kuti Saatani ‘uli mukweena bantu boonse baansi,’ Jehova utondezya babelesi bakwe basyomeka nzila njobeelede kwiinda. (Ciy. 12:9; Is. 30:21) Ikuluswiililisya lulayo lwakwe alimwi akulutobela lyoonse mubukkale bwesu bwabuzuba abuzuba kutupa kusungwaala, kukkomana alimwi kusololela kubuumi butamani.—Tus. 8:32-35.