Bubambe Bupya bwa Muswaangano Waalubazu

Liso lyakalengwa munzila iigambya. (Int. 139:14) Nokuba boobo, lilakonzya kulanga buyo acintu comwe aciindi nsini. Oobo mbocibede mubwini amumaambilambali. Kutegwa tuzumanane kuzibona kabotu zintu zyakumuuya, tweelede kubikkila maano kukucita kuyanda kwa Leza. Akaambo kakuvwula kwazintu zinyonganya munyika ya Saatani, masimpe cileelela kuti muswaangano waalubazu wamwaka wamulimo wa 2006 uyoopandulula mutwe wakuti “Amuzumanane Kuba Aliso Lyabuuya.”—Mt. 6:22.

Ncinzi ncotukonzya kucita kutegwa tukatambule zilongezyo kuli Jehova? (Tus. 10:22) Mubuzyo ooyu uyooingulwa mumakani aakuti “Amujane Zilongezyo Akaambo Kakuzumanana Kuba Aliso Lyabuuya.” Ikubuzya-buzya kuyootondezya mbotukonzya kugwasyigwa kwiinda mukubelesya njiisyo zyamu Magwalo. Makani aakusaanguna ngayookanana mwaambi mweenzu aakuti, “Ikuzumanana Kuba Aliso Lyabuuya Munyika Mbyaabi,” ayootucenjezya kujatikizya zintu zikonzya kupa kuti buumi butuyumine akutusyaanikizya kumuuya. Alimwi tuyooiya icijatikizyidwe mukusala “caabilo cibotu.”—Lk. 10:42.

Mbuti bazyali abantu bamwi mbobakonzya kukulwaizya bakubusi Banakristo kubikkila maano kumbaakani zyakumuuya? Makani aakuti “Ibazyali Bagamika Mivwi Yabo Munzila Iluzi” aakuti “Bakubusi Babelekela Kuzuzikizya Mbaakani Zyakumuuya,” ayoobikkilizya abwiinguzi bwa bazyali abakubusi kumubuzyo ooyu uuyandika. (Int. 127:4) Makani aamamanino ngayooamba mwaambi mweenzu ayoolanga-langa mbotukonzya kuyaambele antoomwe ambunga ya Jehova kutugama, mumukwasyi alimwi ambungano.

Kufwumbwa naa notwazwa akuzyiba kasimpe naa twali kubelekela Jehova kwamyaka minji, cilayandika kuti ‘tuzumanane kuba aliso lyabuuya.’ Muswaangano waalubazu uyootugwasya kucita oobo.