Bubambe Bupya Bwamuswaangano Waalubazu

Mutwe wamakani aamuswaangano waalubazu wamwaka wamulimo wamu 2008 ngwakuti, ‘Tuli Bulongo—Jehova Mubumbi Wesu,’ aazwa mubbuku lya Isaya 64:8. Kukulwaizya kwamu Magwalo kwapegwa kwiinda mupulogilamu eeyi kuyoopa kuti tumvwisye Busongo bwa Mubumbi Mupati Jehova, bululami, nguzu alimwi aluyando.

Makani amulangizi wabbazu aakuti, “Kubeleka Katuli Zilongo Zyabulemu Mumulimo,” ayootondezya zilongezyo zyakuziba kasimpe bantu banji nzyobajana akupa bantu bamwi kuzijana. Makani aakuti “Kuzinzibala Kuyeeya Kuyoomukwabilila” ayootondezya mbotukonzya kukwabililwa ikuti twazinzibala kuyeeya njiisyo zya Jehova ziluleme. Mwaambi uuswaya uyookanana amitwe yakuti “Mutakozyanizigwi Aziyanza Zyaciindi Ecino” alimwi aakuti “Amoololwe a Mubumbi Mupati.” Bazyali abana bayookulwaizyigwa azibeela eezi zyakuti, “Bakubusi Ibajisi Mulimo Kuli Jehova” alimwi aakuti “Mulimo Mupati Bazyali Ngobajisi Mukubumba.” Kwiinda muzitondezyo akubuzya-buzya, tuyookkomana kumvwa akubona bakwesu abacizi nzyobacita mumulimo wabo. Aabo bayanda kulyaaba kuli Leza kwiinda mukubbapatizyigwa beelede kuzibya mulangizi weendelezya cakufwambaana. Amukeetelezye a Ngazi Yamulindizi iyooyiigwa munsondo yamuswaangano.

Kufwumbwa Mubumbi Mupati ncayanda kucita ulacizuzikizya. Pele aumwi weelede kulisalila mbwayanda kuti ayendelezyegwe. Aabo bazumina koololwa akubambululwa a Jehova, mbuli bulongo mubumbi mbwabumba nabelesya muncini, balakonzya kubambwa, kujikwa akuba cilongo cijisi mulimo. Kucita kweelana ambwayanda Jehova munzila eeyi kulatugwasya alimwi kusumpula bweendelezi bwakwe. Twabelekela antoomwe a Jehova, tuyootembaula bweendelezi bwakwe akutambula zilongezyo zinji kapati.