Bubambe Bupya bwa Muswaangano Waalubazu

Imutwe wamakani wamuswaangano waalubazu mumwaka wamulimo wa 2009 ngwakuti: “Langa Kabotu Eyo Milimo . . . , Uizuzye,” uuzwa mulugwalo lwa Ba-Kolose 4:17. Mbotuli Banakristo, tulaabikkila maanu kapati malailile aaya. Imbaakani yesu njakuti tuubeleke cakusyomeka mulimo wesu mbuli mbwaakacita Jesu. (Joh. 17:4) Imwaapostolo Paulo awalo wakatupa cikonzyanyo cibotu kujatikizya mulimo ooyu. Nkaambo walo wakalikanzide kumanizya mulimo wakwe.—Inc. 20:24.

Makani aamulangizi wabbazu ayakutondezya mbuli basikumwaya baindene-indene mbobabuzunda buyumu-yumu mbobajana mumulimo wabo. Mpoonya makani aakuti: “Amulimine Nzimwakasyanga” ayakupandulula mbotukonzya kugwasya baabo “basalidwe buumi butamani.” (Inc. 13:48) Imwaambi uuswaya uyakusaanguna kubandika kapango akapango kalugwalo lwa 2 Ba-Korinto 6:1-10 mumakani aakuti: “Mbotulitondezya Kuti Tuli Basimilimo.” Kumazuba uyakubandika makani aajisi mutwe wakuti: “Amuubikkile Maano Mulimo Wenu.” Cakutadooneka muyakukulwaizyigwa amakani aakuti: “Nobana Abapati Amuukkomanine Mulimo” alimwi aakuti: “Bakubusi Ibauzuzikizya Mulimo.” Aabo bayanda kutondezya kulyaaba kwabo kwiinda mukubbapatizyigwa mumeenda kumiswaangano iiboola, beelede kumuzyibya cakufwambaana mulangizi weendelezya. Iciiyo ca Ngazi Yamulindizi ncibeela cijanika kumiswaangano yesu yaalubazu, yabbazu alimwi ayacooko yoonse. Aboobo amukaletelezye Ngazi Yamulindizi yenu iiyooyiigwa munsondo yamuswaangano waalubazu.

Ikutegwa tuubeleke kabotu mulimo wesu, tweelede kusolekesya akubona masimpe kuti zyintu alimwi amilimo imwi tiizyatumanina ciindi cakucita mulimo ngwatupede Jehova. Kukulwaizyigwa kuzwa mu Magwalo ikuya kupegwa kumuswaangano waalubazu kweelede kutugwasya kuzyiba ncotweelede kucita kutegwa tuzumanane kubona mbotubeleka mumulimo kutegwa tuuzuzikizye.