Atuyumizyanye
1. Ino mbubotu nzi bujanwa ciindi nobaswaya balangizi beendeenda?
1 Mwaapostolo Paulo wakalembela mbungano yaku Roma kuti: “Nkaambo kakuti ndayandisya kumubona, kuti nkamwaabile cimwi cipo camuuya cakumu-yumya, nkukwaamba kuti, tukakazikwe anywe mumyoyo yesu kulusyomo lwesu toonse, nywebo ambebo.” (Rom. 1:11, 12) Kuswaya kucitwa mazuba aano abalangizi beendeenda akwalo kulapa ciindi cakuti tuyumizyanye.
2. Nkaambo nzi kuswaya kwamulangizi wabbazu ncokwaambilizyigwa kakucili ciindi?
2 Imbungano: Kuswaya kwamulangizi wabbazu kanji-kanji kulaambilizyigwa mumbungano kakucili myezi yotatwe. Eeci cipa kuti tulibambile kakucili ciindi kutegwa tukagwasyigwe. (Ef. 5:15, 16) Ikuti kamubeleka mulimo wakumubili, inga mwalomba ciindi kutegwa mukatole lubazu mumulimo wamumuunda munsondo eeyo. Bamwi balabikka bubambe bwakucita bupainiya bwakugwasyilizya mumwezi naswaya. Ikuti mwaalibambila kuyooba mulweendo, sena inga tiimwacinca kutegwa mukajanike munsondo eeyo?
3. Ino ncinzi iswe kutugama ncotukonzya kucita kutegwa tugwasyigwa ciindi naswaya?
3 Makanze mapati aakuswaya kwamulangizi wabbazu ngakukulwaizya akuyiisya muntu aumwi mumulimo wamumuunda. Sena inga mwayanda kubeleka anguwe naa kubeleka amukaintu wakwe ikuti kakwete? Mulangizi wabbazu cilamukonda kubeleka abasikumwaya baindene-indene, kubikkilizya abaabo batajisi luzubo mumulimo wamumuunda. Boonse balakonzya kwiiya kunzila nzyabelesya zyamumuunda akubelesya nzila zili zyoonse nzyakonzya kupa. (1 Kor. 4:16, 17) Kumutamba kwaakulya andinywe kuyoomupa kuti mube acoolwe cakuyanzana kukulwaizya. (Heb. 13:2) Mbwaanga makani aakwe alacinca kweelana aziyandika zyambungano, mweelede kuswiililisya.
4. Mbuti mbotukonzya kumukulwaizya mulangizi wesu wabbazu?
4 Mulangizi Wabbazu: Mwaapostolo Paulo wakali buyo mbuli bakwesu bali mumbungano. Wakajana buyumu-yumu amapenzi alimwi wakali kuyandika kuyumizyigwa. (2 Kor. 11:26-28) Imbungano yaku Roma nobakazyiba kuti Paulo lino mwaange wakali kuunka okuya, bamwi bakaunka kwaakumucinga ku Bbuwa lya Apiyo—musinzo uulapa makilomita aali 74! “Paulo ababone buyo, walumba Leza, wakalika moyo.” (Inc. 28:15) Andinywe mulakonzya kumukulwaizya mulangizi wenu wabbazu. Amumupe ‘bulemu’ kwiinda mukugwasyilizya cabusungu naswaya. (1 Tim. 5:17) Amutondezye kulumba kwanu kwamoyo woonse akaambo kakusoleka nkwamucitila. Walo amukaintu wakwe balakkomana nobabona lusyomo, luyando akuliyumya kwanu.—2 Tes. 1:3, 4.
5. Nkaambo nzi toonse mazuba aano ncotuyandika kukulwaizyigwa?
5 Mu “ziindi zikataazya” zino, toonse tuyandika kukulwaizyigwa. (2 Tim. 3:1) Amusale lino kwaakujanika akutola lubazu munsondo yaalubazu yamulimo amulangizi wabbazu. Toonse—balangizi bamabbazu abasikumwaya tulakonzya kutola lubazu mukuyumizyanya. Ikuti twacita oobo ‘tuyoozumanana kugwasyanya akuyakana umwi aumwi.’—1 Tes. 5:11.