“Paulo Wakalumba Leza Akuyumizyigwa”

Ciindi mbungano yaku Roma noyakamvwa kuti Paulo ulaboola, bakwesu bakeenda makkilomita aabalilwa ku 64 kuyoomucinga. Ino luyando lwakulyaaba oolu ndobakatondezya bakwesu lwakamujatikizya buti Paulo? Bbaibbele lyaamba kuti: “Mbwaakababonena buyo, Paulo wakalumba Leza akuyumizyigwa.” (Mil. 28:15) Nokuba kuti Paulo wakali muntu uukulwaizya kapati mumbungano nzyaakali kuswaya, aciindi eeci naakali mwaange, ngonguwe wakakulwaizyigwa.—2Kor. 13:10.

Mazuba aano, balangizi bamabazu balaswaya mbungano imwi aimwi kuyaabuyumya-yumya bakwesu abacizyi. Mbubwenya mbuli babelesi ba Leza boonse, zimwi ziindi abalo balakatala kapati, balalibilika alimwi akutyompwa. Ciindi ciboola mulangizi wabbazu amukaintu wakwe baakuswaya mbungano yanu, ncinzi ncomukonzya kucita kuti mubayumye-yumye, kutegwa “kube kuyumizyanya?”—Rom. 1:11, 12.

• 

  Amujanike kumiswaangano yakulibambila kuunka mumulimo wakukambauka. Mulangizi wabbazu ulakulwaizyigwa kapati ciindi basikumwaya nobalyaaba kugwasyilizya nsondo yaalubazu yoonse. (1Tes. 1:2, 3; 2:20) Inga mwasola kucita bupainiya bwakugwasyilizya mumwezi ngwaswaya mbungano yanu. Alimwi mulakonzya kulyaaba kubeleka anguwe antoomwe amukaintu wakwe naa kuunka aumwi akati kabo kuciiyo canu ca Bbaibbele. Balakkomana kapati kubeleka abasikumwaya baindene-indene kubikkilizya abapya naa aabo batanaba aluzyibo lunji mumulimo wakukambauka.

• 

  Amubasamausye. Mulakonzya kulyaaba kuti bakasikile kuŋanda yanu naa kubatamba kucakulya. Eeci cipa kuti mulangizi wabbazu alimwi amukaintu wakwe balimvwe kuti mulabayanda kapati. Tabalangili kuti mane mubacitile zintu zinji buya pe naa zidula kapati.—Lk. 10:38-42.

• 

  Amwaaswiilile akwaatobela malailile alimwi alulayo ndwapa. Mulangizi wabbazu ulatugwasya caluyando kubona mbotukonzya kuyaambele mukubelekela Jehova. Zimwi ziindi, ulakonzya kutupa lulayo lulaanguzu kapati. (1Kor. 5:1-5) Ulakkomana kapati ciindi notumvwida alimwi akulibombya.—Heb. 13:17.

• 

  Amutondezye Kulumba. Amumwaambile mulangizi wabbazu alimwi amukaintu wakwe mbomwagwasyigwa akaambo kakulyaaba kwabo. Mulakonzya kucita oobo kwiinda mukubaambila cacigaminina naa kubalembela kagwalo naa kubaulila kakkaadi.—Kol. 3:15.