Tweelede Kuzumanana Kuba Basungu Mumulimo
1 Amwaka kuzwa mu 1992, Bakamboni ba Jehova bali kubeleka cabusungu mumulimo wakukambauka Bwami akugwasya bantu kuba basikwiiya munyika yoonse alimwi bakabeleka mawoola aainda ku 1,000,000,000. (1 bbiliyoni) Tulikkomene kaka kubona kuti mumwaka wa 2007, basikumwaya mu Zambia bakayungizigwa a 3 pasenti amwezi bali kusika kumweelwe waakati-kati uusika ku 127,872.
2 Tulamulumba Jehova nkaambo watugwasya mumulimo wesu ‘muziindi zino zikatazya. (2 Tim. 3:1) Ino ncinzi ciyandika kutegwa tuzumanane kubeleka cabusungu mumulimo ooyu uuyandika kapati?
3 Kaambo Katupa Kuti Katuli Basungu: Citupa kuzumanana kubeleka mumulimo wa Bwami, nduyando ndotujisi kuli Leza akuli basimukoboma aluyandisisyo lwakupona kweelana akulyaaba kwesu. (Mt. 22:37-39; 1 Joh. 5:3) Luyando lutupa kulyaaba kutegwa katutola lubazu mumulimo wakukambauka.—Lk. 9:23.
4 Kutegwa Tuzumanane Kuba Basungu Tweelede Kubeleka Canguzu: Sinkondoma Diabolosi ulasoleka canguzu kutegwa atutyompye mumulimo wesu. Ikukaka kuyiisigwa kwabaabo bali mucilawo motubelekela, kunyonganizigwa anyika, kuyandaula ziyandika mubuumi alimwi akutyompwa akaambo kakutapona kabotu, eezi zyoonse zili akati kazintu nzyabelesya sinkondoma kututyompya mumulimo.
5 Aboobo tweelede kubeleka canguzu kutegwa tuzumanane kuba basungu. Cilayandika kapati kuba ‘aluyando ndotwakajisi kukutaanguna.’ Eeci cibikkilizya kubala akuzinzibala kuyeeya Jwi lya Leza, Bbaibbele alimwi akubelesya zintu nzyotupegwa a “muzike musyomesi uucenjede.”—Ciy. 2:4; Mt. 24:45; Int. 119:97.
6 Mbumunya mbuli businsimi bwamu Bbaibbele mbobwaamba cakusalazya, buzuba bwa Jehova bwakunyonyoona bantu batamukombi Leza buli afwaafwi. (2 Pet. 2:3; 3:10) Akaambo kakuziba boobu, tweelede kubeleka canguzu akuzumanana kuba basungu mumulimo wamumuunda kwiinda mukutola lubazu mumulimo wakukambauka Bwami uucitwa mazuba aano akugwasya bantu kuba basikwiiya.