Aciindi Eeci ca Ciibalusyo, Sena Muyakubwiiya Busungu bwa Jehova Alimwi a Jesu?
1. Ino ncinzi Bakamboni ba Jehova ncobasoleka canguzu kucita ciindi ca Ciibalusyo?
1 Jehova ulazuzikizya makanze aakwe cabusungu. Kalwaamba zilongezyo zimwi zya Bwami bwa Leza, lugwalo lwa Isaya 9:7 lwaamba kuti: “Busungu bwa Jehova wamakamu mbobuyoocicita eeci.” Mbubwenya buyo, ciindi naakali kubeleka mulimo wakwe waanyika, Mwana wa Leza wakatondezya busungu mubukombi bwakasimpe. (Joh. 2:13-17; 4:34) Mwaka amwaka ciindi ca Ciibalusyo, mamiliyoni aabasikumwaya nyika yoonse mbwiizulwa balasoleka canguzu kwiiya busungu bwa Jehova alimwi a Jesu kwiinda mukuyungizya mulimo wabo wakukambauka. Sena andinywe muyoocita oobo?
2. Ino busungu buyootukulwaizya kucita nzi kutalikila mu March 7?
2 Kutamba Bantu ku Ciibalusyo: Mwaka uuno, kutamba bantu ku Ciibalusyo kuyootalika mu Mujibelo, March 7. Amulibambile lino kutegwa mukatole lubazu cabusungu mumulimo wakukambauka. Basikumwaya banookkomene kapati kubeleka cabusungu mucilawo cabo kusikila mpobagolela. Amubeleke canguzu kutamba bantu mbomwiiya limwi Bbaibbele, bantu mbomucitila nyendo zyakupilukila, mbomubeleka limwi, bacibbululu, basicikolonyoko kwiinda mukubapa kapepa kakutamba bantu naa kubatamba kubelesya jw.org.
3. Ino inga twayungizya buti mulimo wesu wakukambauka mu March a April?
3 Bupainiya Bwakugwasyilizya: Busungu alimwi buyootukulwaizya kuyungizya mulimo wesu. Tacidoonekwi kuti banji bayoocikonzya kucita bupainiya bwakugwasyilizya mu March a April, mbwaanga tuyooba acoolwe cakusala kubeleka mawoola aali 30. Ciindi nomukomba mumukwasyi naa kucita ciiyo canu nobeni, amwaapailile makani aaya kubona mbomunga mwacita oobo. (Tus. 15:22) Busungu bwanu mumulimo ooyu bulakonzya kukulwaizya bamwi kuti abalo basungwaale. Ikuti naa mwapanga kucinca kumwi kutegwa muyungizye mulimo, munooyiya busungu bwa Jesu.—Mk. 6:31-34.
4. Ino mbulumbu nzi mbotukonzya kujana kwiinda mukwiiya busungu bwa Jehova alimwi a Jesu?
4 Kwiiya busungu bwa Jehova alimwi a Jesu ciindi eeci ca Ciibalusyo kuyootuletela zilongezyo zinji. Bantu banji abamwi mucilawo cesu bayookambaukilwa. Tuyoojana lukkomano alimwi akukkutila kuboola akaambo kakubelekela Jehova alimwi akwaabila bamwi. (Mil. 20:35) Ciinda kubota ncakuti, tuyookkomanisya Leza wesu musungu alimwi a Mwanaakwe.