“Myoyo Yanu Ipye”
1. Ino tweelede kuubeleka buti mulimo wesu wakukambauka?
1 Milimo yesu yoonse ya Bunakristo yeelede kubelekwa cabusungu. Nkakaambo kaako tukulwaizigwa kuti: ‘Myoyo yesu ipye kukumanina Mwami milimo.’ (Rom. 12:11) Nokuba boobo kuli zyintu zinji zikonzya kutulesya kusungwaala. Ino mbuti mbotukonzya “kubukulusya” busungu bwesu mumulimo wesu wakukambauka Bwami?—2 Tim. 1:6, 7.
2. Ino nkweendelana nzi kuliko akati kakuba aciiyo cesu ca Bbaibbele akuba basungu mumulimo?
2 Ciiyo Cesu ca Bbaibbele: Imuntu musungu mukukambauka nguyooyo uuyanda mulawo wa Leza alimwi ulakakkomanina kasimpe kali mujwi lya Leza. (Int. 119:97) Ikumvwisya kasimpe ciindi notucita ciiyo cesu ca Bbaibbele, kutupa kubeleka cabusungu mumulimo. Ikuyanda Leza, Sikutupa kasimpe kamu Bbaibbele, alimwi akuyanda kuyiisya bamwi kujatikizya kasimpe aaka, kutukulwaizya kumutembaula Leza akwaambilizya zyina lyakwe kubantu boonse. (Heb. 13:15) Masimpe ngakuti, notukambauka makani mabotu cabusungu, tutondezya kuti alayandika kapati.
3. Ino mbuti muuya wa Leza mboukonzya kutugwasya mumulimo wesu wakukambauka?
3 Amupailile Muuya wa Leza: Munguzu zyesu tobeni tatukonzyi kuubeleka kabotu mulimo wakukambauka. Tulakonzya kuba abusungu bwini-bwini ikuti twazumizya muuya wa Leza kuti kaubeleka mulindiswe. (1 Pet. 4:11) Ikuba acilongwe ciyumu a ‘Singuzu zyoonse’ kuya kutupa nguzu zyakuti tucikonzye kukambauka cabusicamba. (Is. 40:26, 29-31) Imwaapostolo Paulo naakajana mapenzi mumulimo wakwe wakukambauka, ‘wakagwasyigwa a Leza.’ (Inc. 26:21, 22) Muuya wa Jehova uupa nguzu ulakonzya kutugwasya kuba basungu mumulimo wesu wakukambauka, aboobo tweelede kuupailila.—Lk. 11:9-13.
4. Ino ncinzi cikonzya kucitika ikuti katukambauka cabusungu, alimwi ino ncinzi ncotweelede kucita?
4 Busungu bwesu notukambauka makani aa Bwami bulakonzya kukulwaizya Banakristoma. (2 Kor. 9:2) Ibantu mucilawo cesu balakonzya kuutambula mulumbe wesu ikuti katukambauka cabusungu akutondezya kuti tulazisyoma nzyotwaamba. Nokuba kuti tuli basungu, tweelede kulibombya akubelesya bupampu notukambauka. (Tit. 3:2) Lyoonse tweelede kubalemeka bamukamwini ŋanda alimwi akulemeka nzyobasala.
5. Ino malailile nzi aakasololelwa amuuya ngotweelede kutobela?
5 Mbotuli basikwaambilizya Bwami, atube ‘amyoyo ipya’ lyoonse. Atusungwaale kwiinda mukuba aciiyo cesu tobeni alimwi akupaila camoyo woonse kuli Jehova, walo uukonzya kutupa muuya uusalala. Kuti twacita oobu, tulakonzya kubeleka mulimo wesu wakukambauka “a-Muuya Uusalala akulamwa kunji kwamumoyo.”—1 Tes. 1:5.