Ziyeezyo zya Ciibalusyo

Baalu beelede kubikkila maano kutwaambo ootu tutobela nobalibambila Ciibalusyo:

◼ Nomusala ciindi cakuyooswaangana, amukabone kuti zikozyanyo tiizyainzyigwa pe kusikila izyuba lyaakubbila.

◼ Mweelede kujana cinkwa alimwi awaini weelede, akubona kuti zyintu eezi zyabambilwa limwi.—Amubone Ngazi Yamulindizi ya March 1, 2003, mapeeji 10-11.

◼ Mbale, matambula, tafwule lyeelede alimwi akasani kaatafwule zyeelede kuletwa kubusena bucitilwa Ciibalusyo akuzyibikka kabotu kakucili ciindi.

◼ Ŋanda ya Bwami naa busena buli boonse nkomuyooswaanganina bweelede kusalazyigwa kabotu-kabotu kakucili ciindi.

◼ Mweelede kusalila limwi basikugwasyilizya abasikwiinzya zikozyanyo zyamulalilo akubalailila kabotu ncobeelede kucita kakucili ciindi alimwi ambobayandika kusama zisani zipa bulemu akulibamba bweelede.

◼ Ibubambe bweelede kucitwa bwakubatolela zikozyanyo zyamulalilo bananike aabo batakonzyi kusika akaambo kakuciswa.

◼ Ikuti kakuli mbungano zinji zibelesya Ŋanda ya Bwami yomwe, mweelede kumvwana kabotu ambungano eezyo kutegwa kutakabi kwaatikizyanya kwabantu amulyango, mutuzila alimwi aabusena busiigwa myootokala.

◼ Ikuti naa muya kubelesya busena bumbi bwakuswaanganina, mweelede kubona kuti mincini yeelede iikomezya majwi mpiili kutegwa boonse bayooswaangana batakajani buyumu-yumu bwakumvwa nzyaamba mwaambi.