Lugwalo Luzwa ku Mutabi

Nomuyandwa Basikumwaya ba Bwami:

Elo kaka tailiboteli micelo njotubona akaambo kamilimo mibotu yakacitwa mumwaka Wamulimo wainda! (Is. 3:10) Mu March, twakaba amyeelwe yaatala yobile njotutanasikide: Mabbuku aayinda ku 47,000 akaabilwa alimwi kwakeendelezyegwa ziiyo zya Bbaibbele zitandila ku 250,000. Masimpe ngakuti ibbuku lya Bbaibbele Ncoliyiisya lilabagwasya basikumwaya bamisela yoonse mbubwenya mbuli cakuluula citobela mbocitondezya:

Lweendo wakajana ciindi cakugwasya bayi bakwe alimwi abasicikolonyina kuti bamvwisye cini Bbaibbele ncoliyiisya. Sicikolo umwi naakabuzya mubuzyo kujatikizya ciingano, ibayi bakalangila kuli Lweendo kuti ape bupanduluzi. Lweendo wakati: “Mbwaanga lyoonse ndaunka kucikolo ndilabwezelezya Bbaibbele lyangu alimwi abbuku lya Bbaibbele Ncoliyiisya, ndakaligusya ibbuku eeli kuzwa mucibbeeke akujalula kumakani aayungizyidwe amutwe wakuti Banakristo Bakasimpe Ncobatabelesyi Ciingano Mubukombi. Twakabala mincali alimwi amagwalo. Eeci cakabakkomanisya bayi bangu alimwi cakandigwasya kutalisya ciiyo ca Bbaibbele kuli mbabo alimwi abamwi bobile mbotwiiya limwi.”

Akaambo kakuvwula kwabantu bali mumbunga kuyaabucitika, kuli mulimo wakubambulula Maanda aa Bwami alimwi amasena aabelesyegwa kucitila miswaangano yabbazu, yaalubazu alimwi ayacooko. Ibakwesu ku Chingola, Kabwe, alimwi aku Mufulira bakatalika kale kugwasyigwa akaambo kakuti masena ngobabelesya kucitila miswaangano mipati akabambululwa. Ciindi cinji, nguzu alimwi alubono zilabelesyegwa mukubambulula masena aakuswaanganina aasalidwe aamuminzi. Mbokunga twanjila mumwaka wamulimo mupya, tupailila kuti muuya wa Leza uyaambele kutukulwaizya kutegwa tugwasyilizye mumulimo wakukambauka Bwami munzila iili yoonse.—Mt. 6:33; 10:41.

Tobanyoko,

Ofesi ya Mutabi yamu Zambia