Kuliyiisya Alimwi Aciiyo Camukwasyi Zilayandika Kapati
1. Ino Kabunga Keendelezya katubikkila buti maanu kuciindi cino, alimwi nkaambo nzi ncocili boobo?
1 Mbubwenya mbocakabede mumwaanda wamyaka wakusaanguna, Kabunga Keendelezya kalabikkila kapati maanu kubukkale bwabantu ba Jehova. (Inc. 15:6, 28) Mbwaanga mapenzi mapati aswena aafwaafwi, cilayandika kapati kuti sikumwaya wa Bwami aumwi kajisi cilongwe ciyumu a Jehova. Ino muyoocibelesya buti ciindi cakabambilidwe kucita Ciiyo Cabbuku Cambungano? Bantu boonse bakulwaizyigwa kubelesya ciindi eeci kukomba mumukwasyi. Kucibelesya cabusongo ciindi eeci kuyoopa kuti tulimvwisye kapati Jwi lya Leza lyakasololelwa amuuya uusalala alimwi akugwasyigwa kapati amakani ngoliyiisya.—Int. 1:1-3; Rom. 11:33, 34.
2. Ino mbuti bubambe bwakukomba mumukwasyi wesu mbobukonzya kubambwa?
2 Buzuba Bwakukomba Mumukwasyi: Basilutwe bamikwasyi bakulwaizyigwa kunyampula mikuli yabo njobakapegwa a Jehova kwiinda mukusinizya kuti bubambe bwaciiyo ca Bbaibbele camukwasyi icigwasya alimwi icicitwa lyoonse nkobuli. (Dt. 6:6, 7) Bakwesu batakwete alimwi abacizyi batakwetwe ibatajisi mikwasyi njobalanganya baya kukonzya kubelesya ciindi eeci kuliyiisya Bbaibbele alimwi akuvwuntauzya. Cilayandika kuti toonse ‘katujana ciindi’ cakuliyiisya alimwi akuzinzibala kuyeeya ikutegwa katujisi cilongwe cibotu a Jehova nokuba kuti tukkede ‘mumazuba mabi.’—Ef. 5:15, 16.
3, 4. Ino ninzila nzi zipedwe kujatikizya zyintu nzyotunga twabelesya kujana makani, alimwi ino tweelede kuba amakanze nzi?
3 Iceelede Kuyiigwa: Watch Tower Publications Index naa Watchtower Library iili a CD-ROM ilakonzya kugwasya mukujana makani aakonzya kupa kuti ciiyo cenu ca Bbaibbele cikondelezye. Mikwasyi ilakonzya kulanga-langa zibalo izili mu Ngazi Yamulindizi, mbuli zyeezyo zijanika lyoonse mbuli cakuti “Nzila Zikonzya Kupa Mukwasyi Kukkomana,” “Amubayiisye Bana Benu” alimwi a “Cibeela Cabana.” Alimwi ayalo Sinsimuka! ijisi cibalo camutwe wakuti “Bakubusi Balabuzya” cijanika lyoonse alimwi azibalo zimbi zikondelezya zyaamba kujatikizya zilenge.
4 Ikubala Bbaibbele cakutabindaana kulakonzya kugwasya muntu aumwi wamumukwasyi kwiibaluka alimwi akubelesya njiisyo zyamu Bbaibbele mubuumi bwakwe. (Heb. 4:12) Ziindi zimwi, mulakonzya kulangilila alimwi akubandika zili muvidiyo yakapangwa ambunga ya Jehova. Mulakonzya kuba abupampu mukusala ncomweelede kwiiya alimwi amboceelede kuyiigwa. Mulakonzya kubabuzya bali mumukwasyi cintu ncobayanda kwiiya.
5. Ino nkaambo nzi kuliyiisya alimwi aciiyo ca Bbaibbele camukwasyi ncoziyandika mubuumi bwesu lino?
5 Ncociyandika Lino: Kuyumya cilongwe cesu a Jehova kuya kutugwasya ‘kwiima nji akubona lufwutuko lwa Jehova.’ (Kul. 14:13) Bazyali bayandika kusololelwa a Leza kutegwa babalele kabotu bana “mukati kabantu bapilingene baleede bamuzukulu uno.” (Flp. 2:15) Bana bayandika kugwasyigwa kutegwa baliyumye mumakani aakutalilemeka kudumide kapati muzikolo sunu. (Tus. 22:3, 6) Banabukwetene beelede kuyumya “kakole kaindulwidwe” naa cilongwe cabo a Jehova. (Muk. 4:12) Aboobo, atucibelesye kabotu ciindi ciceede mukuliyaka ‘mulusyomo lwesu lusalala’!—Jud. 20.