Ino Mbuti Mbobakonzya Kumvwa?
1. Ino nkaambo nzi ncotukonzya kujana buyumuyumu mumulimo wakukambauka, pele ino nkaambo nzi ncotuzumanana?
1 Mbwaanga buzuba bwa Jehova buli aafwaafwi kusika, cilayandika kapati kuti tugwasye bantu cakufwambaana kutegwa babe aluzyibo lwini-lwini lwa Leza alimwi amakanze ngajisi kubantu. (Joh. 17:3; 2 Pet. 3:9, 10) Kucita boobu kulakonzya kukatazya zimwi ziindi akaambo kakuti bantu banji tabayandi kumvwa makani ngotukambauka naa balatusampaula akaambo kamulimo wesu wakukambauka. (2 Pet. 3:3, 4) Nokuba boobo, tweelede kusyoma kuti nkobacili bantu mucilawo cesu ibayoozumina makani mabotu kufwumbwa buyo baakwaamvwa. Ino mbuti bantu bali boobu mbobakonzya kumvwa ikuti kakunyina uukambauka?—Rom. 10:14, 15.
2. Ino cikozyanyo camwaapostolo Paulo citukulwaizya buti?
2 Notukazyigwa: Akaambo kakuti kuli bantu banji ibacizumina kuswiilila mulumbe wa Bwami bwa Leza, tatweelede kutyompwa. Akati kaminzi iili ku Europe, mwaapostolo Paulo wakasaanguna kukambauka makani mabotu ku Filipi. Ciindi Paulo a Sila nobakatamikizyigwa, bakaumwa miluso akubikkwa muntolongo. (Inc. 16:16-24) Nokuba kuti cakabacitikila eeci tiicakali kukkomanisya, Paulo kunyina naakacileka kukambauka pe akaambo kakuyoowa. Ciindi naakaswaya ku Tesalonika, mulweendo lwakwe lwabumisyinali, wakaba “akaanzambwene muli-Leza.” (1 Tes. 2:2) Masimpe, cikozyanyo ca Paulo citondezya kaambo ncotuteelede ‘kulengaana.’—Gal. 6:9.
3. Ino ncinzi cikonzya kupa bantu kuti bacince nokuba kuti tiibakali kwaakkomanina makani mabotu?
3 Bunji bwabantu ibakali kukaka kuswiilila kwamyaka minji, bacinca kujatikizya mbobaubona mulumbe ngotukambauka. Mapenzi aakubula mali aasikila muntu omwe naa bantu banji kubusena bumwi ikapati kuti acitika aciindi citayeeyelwi, kuciswa, kufwidwa umwi wamumukwasyi, naa milumbe iitakkomanisyi yalo iijatikizya zyintu zicitika munyika, zilakonzya kubapa kucinca. (1 Kor. 7:31) Bamwi bajisi bazyali ibakali kukazya bakomena lino, aboobo balayanda kuswiilila. Ikuzumanana kukambauka nkotucita kupa bantu bali boobu coolwe cakuti ‘bakwiilile izyina lya Jehova’ ciindi nocitanamana.—Rom. 10:13
4. Ino ncinzi citukulwaizya kuzumanana mumulimo wakukambauka ‘cakutaleka’?
4 ‘Cakutaleka’: Luyando ndotujisi kuli Leza alimwi akuli basimukoboma luyootukulwaizya kuti ‘tutauleki’ mulimo wakukambauka alimwi akugwasya bantu kuba basikwiiya, mbubwenya mbobakacita baapostolo mumwaanda wamyaka wakusaanguna. (Inc. 5:42) Bantu banji mazuba aano “ba[la]lila akutongela nkaambo kazisesemyo zyoonse zicitwa” lino. (Ezk. 9:4) Elo kaka balaba abulangizi alimwi alukkomano ciindi nobamvwa makani mabotu! Nociba ciindi bantu banji nobakaka kuswiilila, tujisi cisyomezyo camu Magwalo cakuti Jehova ulaikkomanina milimo yesu.—Heb. 13:15, 16.