Amukambauke Cakutaleka
1 Ziindi zimwi inga twayeeya kuti cilawo cesu cabelekwa kabotu-kabotu kwaziindi zinji pele bantu baswiilila mbasyoonto. Nokuba boobo, kuli twaambo tweelede kutupa kuzumanana kukambauka.—Mt. 28:19, 20.
2 Kuti Bukabe Bumboni: Jesu wakasinsima kuti kukambauka Bwami kuyooba cimwi cazibeela ziindene-indene zitondezya “mamanino aaciindi” alimwi akuti kuyoocitwa “kuti bukabe bumboni kumisyobo yoonse.” (Mt. 24:3, 14, BT) Ciindi bantu nobatubona katutola lubazu mukukambauka makani mabotu aa Bwami, tupa bumboni bubotu. Twazwa abusena aawo, bamwi bantu inga batalika kubandika kujatikizya bukambausi bwesu kwamawoola aali mbwaabede naa mazuba, nokuba kuti kunyina nobaswiilila kumulumbe ngotukambauka. Kuzyiba twaambo ncotukambaukila kulatugwasya kukakatila. Tulamukkomanisya Jehova twanootola lubazu mukuzuzikizya businsimi bwamu Bbaibbele kwiinda mukupa bumboni alimwi akucenjezya bantu zyalunyonyooko luboola.—2 Tes. 1:6-9.
3 Kukakatila Kulayandika: Akaambo kakuti kuli zyintu zinyonganya bantu alimwi azyintu zinji zimana ciindi ncobajisi, tuyandika kukakatila ciindi notusoleka kubagwasya kuti babe aluyandisisyo. Umwi mukaintu wakali kuswaigwa ansondo pele nokwakainda mwaka kaswaigwa, ndendilyo naakasala kuti Bakamboni abaitile muŋanda yakwe kutegwa babandike zyamu Bbaibbele. Wakazikkomanina kapati nzyaakamvwa cakuti wakazumina kuba aciiyo ca Bbaibbele, wakatalika kujanika kumiswaangano, alimwi nokwakainda buyo ciindi cisyoonto wakaamba kuti uyanda kubbapatizigwa.
4 Bukkale bwamunyika alimwi abwabantu buyaabucinca kapati. Bantu banji bakali kukaka kuti tubakambaukile inga cino ciindi kabalibambilide kuswiilila kubulangizi bukatalusya mbotukambauka. Ikuti naa muntu omwe buyo waswiilila kumulumbe wa Bwami, kukakatila kwesu kulaba aampindu.
5 Munyika yoonse, bantu banji kapati ‘balalila akutongela akaambo kazisesemyo zyoonse zicitwa.’ (Ezk. 9:4) Zyintu zicitika akaambo kabukambausi bwesu zitondezya kuti bantu aabo ibayanda kucita bululami balaswiilila kumulumbe wa Bwami. (Is. 2:2, 3) Aboobo, atuzumanane kukambauka cakutaleka kwiinda mukukakatila calukkomano mukutola “makani mabotu loko.”—Is. 52:7; Inc. 5:42.