Amuyiisye Munzila Ngubauba
1. Ino ncinzi ciyandika kapati mukuyiisya kabotu?
1 Ikuyiisya munzila ngubauba kulayandika kapati notuyiisya bantu kasimpe. Ikubona mbwaakali kuyiisya Mwiiyi Mupati, Jesu, inga kwatugwasya kuti tube bahaazibwene ‘mukuyiisya.’—2 Tim. 4:2; Joh. 13:13.
2. Ino ncinzi cijatikizyidwe mukuyiisya munzila ngubauba, alimwi ino mbuti nzila eeyi mboikonzya kugwasya?
2 Kamubelesya Mabala Maubauba: Imulumbe waa Cilundu ulijisi njiisyo zimwi ziyandika kapati, pele zyoonse zyakaambwa munzila ngubauba. (Mt. zyaandaano 5-7) Makamu aabantu bakali kumuswiilila Jesu naakali kuyiisya “[b]akakankamana kukwiisya kwakwe.” Bamapulisa ibakatumwa kuti bakaakumujate, akabanjila makani ngaakali kuyiisya cakuti bakati: “Takunabede muntu uuamba bobuya.” (Mt. 7:28, 29; Joh. 7:46) Tatuyandiki kubelesya mabala azikozyanyo zikatazya kumvwa, ikutegwa kasimpe kabanjile bantu. Tulakonzya kubelesya mabala ngobabelesya lyoonse bantu notuyiisya kasimpe.
3. Ino nkaambo nzi bamwi ncobali acilengwa cakuyiisya baswiilizi babo zyintu zinji aciindi comwe, alimwi ino mbuti mbocikonzya kulekwa eeci?
3 Makani Ngobeelede Kwaambilwa Aciindi Comwe: Jesu wakali kubabikkila maano baswiilizi bakwe, aboobo wakalaazyi makani ngaakali kukonzya kubaambila aciindi eeco. (Joh. 16:12) Tweelede kubazyiba kabotu mbotuyiisya akucinca nzila njotubelesya kweelana ambobabede, ikapati kuti katukambaukila basazima, bantu bajisi luyandisisyo mukwiiya Bbaibbele naa bana. Tatweelede kubayiisya zyintu zinji aciindi comwe nokuba kuti balibonya kuti balabikkila maano. Babombe myoyo baya kuzumanana kwiiya kutegwa bazyibe Jehova Leza.—Joh. 17:3; 1 Kor. 3:6.
4. Ino nkaambo nzi ncociyandika kubikkila maano kutwaambo tupati-pati muciindi cakuvwuzya zyakwaamba?
4 Amubikkile Maano Kutwaambo Tupati-pati: Jesu tanaakali kuvwuzya zyakwaamba naakali kuyiisya. Naakaamba kuti: “Boonse abali muzyuumbwe, bayoozwa,” tanaakapandulula makani manji kujatikizya ciya kucitika baakubusyigwa. (Joh. 5:28, 29) Notuyiisya bantu Bbaibbele, tweelede kubikkila maano kutwaambo tupati-pati tuli mucibalo ciyiigwa, ikutali kunjizya makani aambi.
5. Ino mbubotu nzi mbotuyoojana akaambo kakuyiisya munzila ngubauba?
5 Tulamulumba kaka Jehova kuti watuyiisya zyintu zyoonse nzyotuyandika kuzyiba munzila ngubauba! (Mt. 11:25) Ikuti naa twazumanana kuyiisya munzila ngubauba, tuya kukkomana akaambo kakuti mulimo wesu wamumuunda unikweenda kabotu.