Twaambo Totatwe Tugwasya Kuyaambele Mukuyiisya Kwanu
1. Nkaambo nzi ncotweelede kuyaambele mukuyiisya kwesu?
1 Boonse basikumwaya Banakristo mbaamayi. Kufwumbwa naa tuli mulweendo lwakusaanguna, mulweendo lwakupilukila, naa mukweendelezya ciiyo ca Bbaibbele, tuli mukuyiisya bantu. Alimwi makani ngotubayiisya bantu alilibedelede. Tusalazya “malembe aasalala,” aakonzya kupa bantu kuti babe ‘basongo kutegwa bakafwutuke.’ (2 Ti. 3:15) Eelo kaka ncoolwe citaliboteli! Ntootu twaambo totatwe tukonzya kutugwasya kuyaambele mukuyiisya kwesu.
2. Mbuti mbotukonzya kuyiisya munzila nguba-uba?
2 Kuubya-ubya: Ikuti makani katwaazyi kabotu, tulakonzya kuluba kuti alakonzya kumukatazya muntu uutaazyi kabotu. Aboobo, nomweendelezya ciiyo ca Bbaibbele tamweelede kuvwuzya twaambo tutayandiki. Muciindi caboobo, amwaambe twaambo tupati-pati. Ikwaambaula maningi tacaambi kucizyiba kuyiisya. (Tus. 10:19) Kanji-kanji cilainda kubota kubala buyo magwalo aajisi twaambo tupati-pati. Mwamana kubala lugwalo, amubikkile buyo maano kucibeela calugwalo cikajatikizya kaambo kali mukubandikwa. Mulumbe waa Cilundu, uulembedwe kuli Matayo caandaano 5 kusikila ku 7, ulijisi makani aakasimpe aayandika kapati, nokuba boobo Jesu wakayiisya munzila nguba-uba alimwi wakabelesya majwi masyoonto aasalidwe kabotu.
3. Ino zikozyanyo zigwasya buti, alimwi nzikozyanyo zili buti zikonzya kugwasya?
3 Zikozyanyo: Zikozyanyo zilapa kuyeeya, zilanjila mumoyo, alimwi zilagwasya kwiibaluka twaambo. Mutalimvwi kuti mweelede kuba sitwaano kutegwa kamupa zikozyanyo zibotu. Kanji-kanji, Jesu wakali kubelesya zikozyanyo zifwaafwi, zitakatazyi kumvwisya. (Mt. 7:3-5; 18:2-4) Zifwanikiso zizekaulidwe apepa azyalo zilakonzya kugwasya. Ikulibambila kulakonzya kumugwasya kujana zikozyanyo zigwasya.
4. Mbuti mbotukonzya kubelesya kabotu mibuzyo?
4 Mibuzyo: Mibuzyo ipa sikwiiya kuyeeya. Aboobo, amukkazyike moyo mwamana kubuzya mubuzyo. Ikuti naa mwafwambaana kwiingula nobeni, tamukazyibi ncayeeya sikwiiya wanu. Ikuti wapa bwiinguzi butaluzi, muciindi cakumwaambila bwiinguzi buluzi, inga cainda kubota kumubuzya mibuzyo aimwi iikonzya kumusololela kubwiinguzi buluzi. (Mt. 17:24-27) Nincobeni kuti akati kesu, kunyina mwiiyi uulondokede. Aboobo, Bbaibbele lilatukulwaizya kubikkila maano kapati kukuyiisya kwesu. Ikucita boobo kuyooleta zilongezyo zitamani kulindiswe akulibaabo batuswiilila.—1 Ti. 4:16.