Mbotweelede Kulibambila Muswaangano wa Mulimo
1. Ino Muswaangano wa Mulimo wakabambilwa nzi, alimwi ino ncinzi ncotweelede kucita kutegwa utugwasye?
1 Muswaangano wa Mulimo wakabambilwa kutugwasya kuti tube bakambausi bauzyi kabotu mulimo. Makani aabandikwa mumuswaangano ooyu ajatikizya kukambauka makani mabotu aa Bwami, kugwasya bantu kuba basikwiiya alimwi akwaambilizya buzuba bwa Leza bwalubeta iluli afwaafwi. (Mt. 28:20; Mk 13:10; 2 Pet. 3:7) Ikuti naa twalibambila kabotu akutola lubazu, imuswaangano ooyu inga watugwasya kapati.
2. Ino mbuti mbotukonzya kulibambila kutegwa tukaaswiilile makani?
2 Makani: Imabbuku mwaazwa makani nkwaali mumalailile aapegwa kumwaambi. Mulakonzya kulibambilila limwi makani aayakubandikwa kubikkilizya amagwalo aabikidwe, mpoonya amuyeeye mbomukonzya kwaabelesya mumulimo wenu wamumuunda.
3. Ino ncinzi ncotweelede kucita notulibambila mubandi wakubuzya akwiingula?
3 Mubandi Wakubuzya Akwiingula: Cibeela eeci cinakucitwa mbuli ciiyo ca Ngazi Yamulindizi. Twaambo twakumatalikilo atwakumamanino tweelede kwaambwa mubufwaafwi. Nomulibambila amweenge twaambo tupati-pati mumincali alimwi amulibambile kuya kwiingula munzila iikulwaizya.
4. Ino mbuti mbotukonzya kulibambila cibeela camubandi abaswiilizi?
4 Mubandi Abaswiilizi: Cibeela eeci cinakubandikwa mbuli makani, nokuba boobo mwaambi unakubuzya mibuzyo imwi kuti baswiilizi baingule. Ikuti nomwali kulibambila mwatweenga twaambo tupati-pati akwaabala magwalo aabikidwe, mulakonzya kwiingula mwaambi abuzya mibuzyo. Imukwesu weendelezya cibeela eeci unakubalomba baswiilizi kuti baambe twaambo tupati-pati tuyandika kwiinda mukubuzya mibuzyo.
5. Ino inga twacita buti kutegwa zitondezyo eezi zitugwasye?
5 Zitondezyo: Zibeela zimwi zilabikkilizya azitondezyo zitondezya makani aabandikwa mbwaakonzya kubelesyegwa mucilawo cenu. Ibaalu, basikumwaya basimide naa bapainiya banakulombwa kucita zitondezyo ezei. Nomulibambila cibeela eeci amuyeeye mbocikonzya kucitwa citondezyo acimwi. Camana citondezyo, amuyeeye mbomukonzya kuzyibelesya nzyomwabona nomukambaukila bantu baindene-indene. Amubone kuti mulilijisi bbuku naa magazini iibelesyegwa mucitondezyo. Nomucita Kukomba Kwamumukwasyi, mulakonzya kuzicita zitondezyo eezi zimwi.
6. Ino nkaambo nzi ncotweelede kulibambila Muswaangano wa Mulimo?
6 Muswaangano wa Mulimo inga watukkomanisya ikuti twalibambila kabotu akuzilangila nzyotuya kwiiya. Ikucita boobo inga kwapa kuti katukulwaizyanya kumuuya. (Rom. 1:11, 12) Ikuti katulibambila Muswaangano wa Mulimo, tuya kucikonzya kuuzuzikizya mulimo wesu wakukambauka.—2 Tim. 3:17