Malailile Kuli Baabo Ibakanana Makani mu Muswaangano wa Mulimo
Kutalikila a Mulimo Wesu wa Bwami ooyu, mulongo wa Muswaangano wa Mulimo mbuuna kulembwa wacinca. Malailile aaya aatobela alasalazya cibalo cakajisi mutwe wakuti “Mbotweelede Kulibambila Muswaangano wa Mulimo” icakali mu Mulimo Wesu wa Bwami wa May 2009:
◼ Makani: Aaya makani azwa mucibalo ncomwapegwa alimwi baswiilizi tabeelede kutola lubazu. Mwaambi weelede kubikkila maano kwaamba zyintu zikonzya kugwasya mbungano.
◼ Mibuzyo Abwiinguzi: Mbweena mbuli mbocicitwa ciiyo ca Ngazi Yamulindizi, cibeela eeci cijisi makani aantalisyo mafwaafwi aamamanino alimwi mibuzyo yeelede kubuzyigwa mumincali yoonse. Sikweendelezya tayelede kuvwuzya zyakwaamba. Magwalo aali mucibalo alakonzya kubalwa ikuti ciindi kaciliko. Mincali tayeelede kubalwa ccita kuti malailile mbwaamba oobo.
◼ Mubandi Abaswiilizi: Mumakani aaya baswiilizi balatola lubazu. Taali makani aakubandika buyo mwaambi alikke alimwi talili lyoonse nayelede kubuzya mibuzyo.
◼ Zitondezyo Akubuzya-buzya: Malailile aamba kuti “amucite citondezyo” aamba kuti mukwesu uupedwe cibeela eeci nguujisi mukuli wakuyandaula bantu; aboobo walo tayelede kucita nguwe citondezyo. Aabo mbasala kuti bamugwasye bayelede kuti kabajisi cikozyanyo cibotu akuti balakonzya kucita citondezyo alimwi weelede kulibambila ambabo kakucili ciindi. Tamweelede kubelesya basikumwaya bapya alimwi batajisi luzibo kutondezya mulimo mboucitwa akaambo kakuti muyanda buyo kuti balibonye acibumbili, pele eeci tacaambi kuti tabakonzyi kubelesyegwa kuba beniŋanda. Aabo bacita citondezyo beelede kulanga baswiilizi. Aabo “babuzyigwa-buzyigwa” beelede kuunka kucibumbili ikutali kukkala abusena mpobakkede. Aabo ibaya kucita zitondezyo abajisi makani aakubuzyigwa-buzyigwa beelede kwiinduluka akubona mbobaya kucita acibumbili. Ikuti ciindi camana, mukwesu uupedwe cibeela eeci tayelede kwaamba zinji alimwi tayelede kugusya zitondezyo azyakubuzya-buzya. Bakutausi beelede kubuzya mweendelezi wakabunga kabaalu naa mwaalu uumbi kabatanasala bakubagwasya.
Ikuti naa kuli cibeela cijisi malailile aalibedelede, ayelede kutobelwa. Ikuti bakwesu baatobela malailile aali mu Muswaangano wa Mulimo kweelana ambokwaambwa atala aawa, nkokuti Muswaangano wa Mulimo uyakucitwa “kabotu akucililana.”—1 Kor. 14:40.