Kabbokesi Kamubuzyo
◼ Mbuti mbotunga twabona kuti cibeela camuswaangano acimwi camanizyigwa muciindi cipedwe?
Ciindi cilafwambaana kumana notubandika makani aakulwaizya abeenzuma. Aboobo cilakonzya kukatazya kweendelezya zibeela zyamuswaangano muciindi cipedwe. Ino ncinzi cinga cagwasya kumanizya penzi eeli?
Amutalike aciindi cibikkidwe. Eelyo mbungano yoonse noyiswaangana, inga cagwasya kwaambila baswiilizi kuti bakkale kakucili miniti yomwe naa obile kutegwa muswaangano utalike aciindi cibikkidwe munzila yabulondo. (Muk. 3:1) Miswaangano iijatikizya tukamu tusyoonto, mbuli miswaangano yamulimo wamumuunda tayeelede kumusyigwa pe kutegwa kulindilwe bacedwa.
Amulibambile kabotu. Inzila iigwasya kutobela ciindi nkulibambila kabotu. Amwiizyibe kabotu mbaakani yacibeela ncomubandika. Amutuzyibe twaambo tupati-pati alimwi amubone kuti twakankaizyigwa. Mutasowi ciindi aatwaambo tuniini-niini. Makani aanu aabe mauba-uba kutobela. Ikuti cibeela canu kacijatikizya zitondezyo naa kubuzya-buzya, amuziinduluke kakucili ciindi. Kusikila mpomukonzya, amubone ciindi ncocitola cibeela canu nomuciinduluka cakupozya.
Amwaabanye makani aanu. Kunyina makani naa cibeela canu mmakani naa mmubandi abaswiilizi, inga camugwasya kwaabanya muzibeela-beela makani aanu. Amusale bulamfwu bwaciindi ncomuyootola acibeela acimwi, alimwi amucilembe ciindi eeci kumbali kwatwaambo twanu. Mpoonya amucitobele ciindi eeco nomukanana. Nouli mubandi abaswiilizi, amweelebe cilengwa cakulekela bwiinguzi bunji kumatalikilo cakuti inga mwayandika kwaabandika calubinda makani aayandika kapati aali kumbele. Basikweendelezya Ciiyo ca Ngazi Yamulindizi beelede kubona kuti kuli ciindi cibotu cakubandika kabbokesi kakuyiisya kali kumamanino. Alimwi beelede kubikkila maanu kuti tiicabelesyegwa mumubandi ciindi cibikkilidwe lwiimbo lwamamanino amupailo.
Amumanizye aciindi cibikkidwe. Ikuti muswaangano kaujisi zibeela zili mbozibede, mbuli Muswaangano Wamulimo, imwaambi aumwi weelede kubikkila maanu aciindi cibeela cakwe noceelede kutalikwa akumanizyigwa. Ino ncinzi cinga cacitwa ikuti kwabonwa kuti muswaangano ulangilwa kwiindilila aciindi cibikkidwe? Imukwesu omwe naa bambi bajisi zibeela beelede kubona kuti ciindi catobelwa kwiinda mukubandika buyo twaambo tupati-pati akusiya tuniini-niini. Ikucikonzya kucita boobo ncitondezyo camwiiyi uucibwene.
Tobaswiilizi tulakonzya kumugwasya mukwesu weendelezya kwiinda mukupa bwiinguzi bufwaafwi alimwi bugaminide. Aboobo, toonse tulakonzya kugwasya mukuba amiswaangano iicitwa “kabotu akucililana.”—1 Kor. 14:40.