Amanizyigwa Muciindi Ceelede Akwaabanizyigwa Kabotu

NOKUBA kuti kuyiisya kwanu kweelede kubikkilwa maano kapati, ciindi cipedwe kumakani aanu acalo cilayandika kubikkilwa maano. Miswaangano yesu yeelede kutalika akumana aciindi cigaminide. Ikucita boobu ciyanda kubelekela antoomwe kuli boonse ibajisi cibeela mububambe.

Kumazuba aambwa mu Bbaibbele, ibuumi bantu bakali kububona munzila iindene ambobubede sunu mumasena manji. Ciindi cakali kwaambwa mukweezyeezya amajwi aakuti, “acikasaalizi” naa “kumazuba.” (Mt. 20:3-6; Joh. 1:39) Kwakanyina cakali kubapa kulibilika kumakani aaciindi cigaminide cakukutauka milimo. Mumbazu zimwi zyanyika sunu, mbocibonwa ciindi mbweena oobu.

Pele nokuba kuti ziyanza naa nzyayanda muntu amuntu zilakonzya kupa bantu kutabikkila maano kuciindi, tulakonzya kugwasyigwa kapati ikuti twaiya kucibikkila maano. Nokuli baambi banji bapedwe zibeela zyamakani, kweelede kubikkilwa maano kuciindi cipedwe kucibeela acimwi. Injiisyo yakuti “zintu zyoonse buyo zicitwe kabotu akucililana” ilakonzya kubelesyegwa kabotu kukutobela ciindi cazibeela zyamuswaangano wesu.—1 Kor. 14:40.

Kumanizya Muciindi Cipedwe. Kulibambila ngomusamu. Ikanji-kanji, baambi bajisi penzi lyakumanizya muciindi cipedwe tabalibambili kabotu. Balakonzya kabalisyoma kapati. Ambweni balakonzya kusumpya ciindi cakulibambila, babona kuti camana, nkokutalika kulibambila. Icipati cigwasya mukumanizya muciindi ceelede, nkubikkila maano kumakani akuyandisisya kulibambila kabotu.

Sena mujisi cibeela cakubala? Cakusaanguna amwiinduluke Ciiyo 4 kusika ku 7 zijatikizya kupasaula kukanana, kwiima-ima, kukankaizya caambwa akukankaizya twaambo tupati-pati. Mwamana amulubelesye lulayo oolo nomubala cakupozya cibalo ncomwapegwa. Amubone ciindi ncomukonzya kutola. Sena muyandika kubala cakufwambaana kutegwa mumanizye muciindi cipedwe? Amufwambaane kubala muzibeela zitayandiki kapati, pele amuzumanane kwiima-ima akuyozya-yozya kutegwa mukankaizye twaambo tuyandika kapati. Amwiinduluke-induluke. Mbomuya buleka kugaba-gaba kubala, ciya kumuubila kumanizya muciindi.

Sena muya kukanana kwiinda mukubelesya twaambo tulembedwe? Taciyandiki pe ikulemba zinji—limwi aakuba makani aakubala—kucita kuti mumanizye muciindi. Nomwakali kubelekela a Ciiyo 25, mwakaiya nzila iigwasya. Kamutuyeeya twaambo ootu tosanwe: (1) Amulibambile makani aali kabotu, pele ikutali manji. (2) Amuyeeye twaambo tupati-pati, pele ikutali mabala oonse mbwaabede. (3) Amulembe apepa lyamakani ciindi ncomuyanda kuyootola mucibeela acimwi naa ciindi ceelede kutolwa mwasika atwaambo tumwi. (4) Nomulibambila, amubone twaambo tukonzya kugusyigwa ikuti camusiya ciindi. (5) Amusoleke mbomuya kukanana.

Kulibambila cakwiinduluka-induluka kulayandika kapati. Nomwiinduluka, amubikkile maano kuciindi cipedwe cibeela acimwi camakani aanu. Amwiinduluke ziindi zinji kusikila makani oonse amana muciindi cipedwe. Mutabikkilizyi twaambo tunji kapati. Amulipe ciindi cili mbocibede nkaambo ikukanana makani kubaswiilizi kulakonzya kumutolela ciindi cilamfwu kwiinda leelyo nomusoleka nobeni.

Ikwaabanya Zibeela. Ikumanizya muciindi kuli mbokuswaangene akwaabanya kabotu zibeela zyamakani. Ciindi cinji ceelede kubelesyegwa ikukanana cibeela cipati camakani. Mpaali twaambo tujisi njiisyo iiyandika kapati. Intalisyo yeelede kuba yabulamfwu bweelede kutegwa izuzikizye mbaakani zyotatwe zyaambwa mu Ciiyo 38. Cibeela cipati camakani taceelede kulampa cakuti kunyina aciindi cakwaamba majwi aamamanino kweelana a Ciiyo 39.

Kusoleka kwanu mukumanizya muciindi kuyoopa kuti abe makani aagwasya alimwi kuyootondezya kuti muli abulemu kubaambi bamwi aabo bajisi zibeela zyamakani kubikkilizya ambungano yoonse.