Sena Mulakonzya Kuyungizya Ciindi Ncomubeleka Mumulimo Wenu?
1. Ino ncinzi ciyandika cakufwambaana mumulimo wesu wakukambauka, alimwi ino nkaambo nzi?
1 Naakabona kuti bantu banji bakali kuyandisisya kumvwa makani mabotu aa Bwami, Jesu wakaambila basikwiiya bakwe kuti “amukumbile Mwami uuli amuunda kuti atume batebuzi kukutebula kwakwe.” (Mt. 9:37, 38) Mbokunga tuli kumamanino aaciindi camulimo wakutebula, mulimo wesu weelede kucitwa cakufwambaana lino kwiinda lyoonse. Eeci caamba kuti tweelede kupaila kutegwa tucikonzye kulanga-langa mbotukonzya kuyungizya ciindi ncotubeleka mumulimo wamumuunda.—Joh. 14:13, 14.
2. Mbokunga kuyandika babelesi banji mumulimo wamumuunda, ino ncinzi basikumwaya bambi ncobacita?
2 Kuyungizya Ciindi Ncotubeleka Mumulimo: Kwiinda mukusololelwa alimwi akugwasyigwa a Jehova, banji balilembya kuba bapainiya. (Int. 26:2, 3; Flp. 4:6) Bamwi bakali kubikka bubambe bwakuti kabacita bupainiya bwakugwasyilizya kwamwezi omwe naa kwiinda waawo mumwaka. Eeyi nenzila mbotu yakabagwasya kuti bayungizye ciindi ncobabeleka mumulimo wabo. Lukkomano ndobakajana kwiinda mukubeleka mulimo wabupainiya bwakugwasyilizya lwakapa kuti bunji bwabo bayeeye kulilembya mulimo wabupainiya bwaciindi coonse.—Inc. 20:35.
3. Ikuti naa kuli nomwakacitide bupainiya, ino ncinzi ncomukonzya kuyeeya kucita lino?
3 Sena Mulakonzya Kutalika Mulimo Wabupainiya Alimwi?: Ikuti naa mwakali kubeleka mulimo wabupainiya, kweelede kuti muciyeeyede zyintu zikkomanisya zyakali kucitika ciindi nomwakali kucita mulimo ooyu. Sena kuli nomwakapailide kutegwa mubone mbomukonzya kuba bapainiya alimwi? Andiza zyintu zyakapa kuti muleke mulimo wabupainiya taziciwo. Ambweni mulaangulukide lino kutalika mulimo ooyu waalubazu alimwi.—1 Joh. 5:14, 15.
4. Ino ncoolwe nzi cilibedelede ncotujisi toonse?
4 Mulimo ooyu wakutebula iwakatalika kaindi kubelekwa ulaafwaafwi kusika kumagolelo. (Joh. 4:35, 36) Toonse atulange-lange bukkale bwesu kutegwa tubone naa tulakonzya kuyungizya ciindi ncotubeleka mumulimo wamumuunda. Ikuti naa tubona kuti tatukonzyi kuyungizya ciindi ncotubeleka mumulimo wesu, sena tulakonzya kujana nzila zikonzya kutugwasya kuti tube bakambausi bacibwene? (Mk. 12:41-44) Elo kaka bali acoolwe boonse bajisi bukkale bubazumizya kuti babelesyegwe a Jehova mumulimo ooyu uulibedelede wabupainiya!—Int. 110:3.