Bukambausi Bwamumugwagwa Bugwasya
1. Ino munzila nzi yomwe motukonzya kumwiiya Jesu?
1 Ciindi Jesu naakali kukambauka ano anyika, wakali kubakambaukila bantu mbaakali kuswaanganya munzila alimwi amumasena aabuleya. (Lk. 9:57-61; Joh. 4:7) Wakali kuyanda kukambaukila bantu banji. Mazuba aano, bukambausi bwamumugwagwa nenzila mbotu yakugwasya bantu kutegwa babe abusongo bwabunaleza. (Tus. 1:20) Ikuti katutalisya mibandi akubelesya bupampu, kuzwidilila kwesu kuyoolibonya.
2. Mbuti kubweza ntaamu mbokujatikizyidwe mumulimo wamumugwagwa?
2 Amubweze Ntaamu: Cilainda kugwasya kutalisya mibandi ikutali kwiimikila buyo naa kukkala buyo abusena bomwe akulindila basimweenda nzila kutegwa bamwaambauzye. Amumwete-mwete, amubalange, amutondezye kuti muli balongwe. Kuti kamubeleka abasikumwaya bamwi, inga cainda kubota kuti aumwi wabandika abantu bamugeme alikke. Cilayandika alimwi kupilukila kumuntu ooyo muntu watondezya luyandisisyo. Ikuti kacikonzyeka, mwamana mubandi mulakonzya kumulomba muntu ooyo cabulemu kutegwa muzyibe nkwakkala. Basikumwaya bamwi balacita bukambausi bwamumugwagwa abusena bomwe ziindi zinji, eeci cilabagwasya kukambaukila kubantu mbamunya cakwiinduluka-induluka kutegwa bazumanane kubagwasya kuba aluyandisisyo.
3. Mbuti mbotukonzya kubelesya bupampu notucita bukambausi bwamumugwagwa?
3 Amubelesye Bupampu: Amubelesye bupampu nomusala akwiimina alimwi abantu mbomuyanda kukambaukila. Tacikonzyeki kukambaukila basimweenda nzila boonse. Amupakamane. Mucikozyanyo, ikuti muntu ulibonya kuti ulibindide, cili kabotu kumuleka buyo kuti ainde. Ikuti kamukambaukila afwaafwi abusena bwakucitila makwebo, amucenjele kutegwa bapati bamilimo batalibiliki akaambo kakuti mubandika ababelesi babo. Cili kabotu kukambaukila babelesi nobazwa mukati ikutali nobanjila. Amutalisye mubandi munzila iitakonzyi kubayoosya naa kubagambya. Alimwi amupakamane ciindi nomwaabila mabbuku. Ikuti bantu taakwe nobatondezya luyandisisyo, mulakonzya kubaabila tulakiti ikutali mamagazini.
4. Nkaambo nzi bukambausi bwamumugwagwa ncobuli nzila mbotu yakukambauka alimwi iikkomanisya?
4 Bukambausi bwamumugwagwa bulatugwasya kumwaya mbuto zinji zyakasimpe muciindi cisyoonto. (Muk. 11:6) Bamwi bantu mbotuswaanganya mbaabo mbotutajani mumulimo wesu waŋanda aŋanda. Amukacite bukambausi bwamumugwagwa akujana lukkomano akaambo kakukambauka munzila eeyi iigwasya.