Bubambe Bukkomanisya Alimwi Bupya Bwakukambauka Kubuleya
1. Ino mbungano izijisi masena mwiinda bantu banji zyakulwaizyigwa kucita nzi?
1 Mbungano zijisi masena mwiinda bantu banji zyakulwaizyigwa kuba abubambe bwakukambauka kubuleya kwiinda mukubelesya tutebulu naa twakubikkila mabbuku twakukuba. Ikuti naa kwabelesyegwa kakubikkila mabbuku kakukuba, sikumwaya omwe weelede kwiimikila naa kukkala munsi-munsi ankako. Nokuba boobo, ikuti naa kwabelesyegwa katebulu, basikumwaya bobilo beelede kuba munsi-munsi ankako. Aabo babelekela ali twakubikkila mabbuku ootu beelede kusangalizya, kuseka-seka, alimwi akusamausya. Ikuti muntu walibonya kuba aluyandisisyo kumabbuku, sikumwaya umwi inga watalisya mubandi, andiza kwiinda mukwaamba kuti, “Sena kuli nomwakalibuzyide kujatikizya Bbaibbele ncolyaamba mukaambo aaka?” Mpoonya sikumwaya uumbi naa bobilo beelede kwiimina mpobakonzya kukabona katebulu naa kakubikkila mabbuku kakukuba nobacita bukambausi bwamukwiizya.
2. Amwaambe cakuluula citondezya bubotu bujanika mukucita bukambausi bwakubuleya kwiinda mukubikka mabbuku akatebulu.
2 Bubambe oobu bwapa kuti kube ziiyo zipya zya Bbaibbele zinji. Sicikolo umwi uuli kukkoleji wakasala kulemba makani kujatikizya Bakamboni ba Jehova, pele wakaalilwa kujana Ŋanda ya Bwami kuti avwuntauzye. Mvwiki yakatobela wakabona katebulu kajisi mabbuku akkoleji. Ciiyo ca Bbaibbele cakatalisyigwa, aboobo lino sikwiiya ooyu ngusikumwaya uubbapatizyidwe alimwi ulatola lubazu mubukambausi buli boobu.
3. Ino bamwi balimvwa buti kujatikizya nzila eeyi yakukambauka kubuleya?
3 Mucizyi umwi uukkomanina bukambausi bwamusyobo ooyu bwakukambauka kubuleya wakaamba kuti: “Bantu balaboola kukatebulu ikajisi mabbuku akubweza mamagazini mapya. Bamwi tabanamvwide kujatikizya Bakamboni ba Jehova. Ndabona kuti kwiinda mukubelesya nzila eeyi, banji balakonzya kukambaukilwa.” Mucizyi uumbi wakaamba kuti, “Oobu mbukambausi bukkomanisya, nzila mpya yakukambauka nkaambo bantu balatusikila alimwi nokuba kuti tabajisi luyandisisyo kapati, balayanda kuzyiba.”
4. Ino cigwasya buti kubikka katebulu kajisi mabbuku aciindi nciconya alimwi aabusena mpamunya mvwiki amvwiki?
4 Cilagwasya kubikka katebulu naa kakubikkila mabbuku kakukuba abusena mpamunya, mazuba ngoonya, alimwi aciindi nciconya mvwiki amvwiki. Akaambo kaceeci, bantu balazyibila kubona katebulu akulimvwa kwaanguluka kuunka kukatebulu akubuzya mibuzyo naa kubweza mabbuku. Sena mbungano yanu ilijisi bubambe bwakukambauka kubuleya? Ikuti kacili boobo, andiza mulakonzya kutola lubazu mumulimo ooyu uukomanisya alimwi uuzwidilila ‘wakwaambilizya Bwami bwa Leza koonse-koonse.’—Lk. 9:60